Слава Ему во веки!

Аминь.[1]

Служба и акафистъ Сладчайшему

Имени IисусъХристову.[2]

Выпуск 2

(Сiю службу совершать 7 ноября)[3]

+

На велицей вечерни

Если нетъ священника, благословляетъ старшiй: Молитвами святыхъ отецъ нашихъ, Господи Iисусе Христе Боже нашъ, помилуй насъ. предстоящiи поютъ: Аминь. Затемъ поютъ:

1.Прiидите поклонимся Цареви нашему Богу.

2.Прiидите поклонимся и припадемъ Христу Цареви нашему Богу.

3.Прiидите поклонимся и припадемъ Самому Христу Цареви и Богу нашему.

4.Прiидите поклонимся и припадемъ Ему.

Благослови душе моя Господа. (псаломъ 103)

Ектенiя: (Господи помилуй 12 разъ, и: Аминь)

Блаженъ мужъ: первый антифонъ.

Ектенiя: (Господи помилуй 3 раза, и: Аминь)

Господи воззвахъ къ Тебе, услыши мя:

Чтецъ читаетъ стихи: Положи Господи, храненiе устомъ моимъ: и прочiе до:

Аще беззаконiя назриши Господи: Отсюда после каждого стиха поемъ стихиры на 6, повторяюще первые две.:

Стихиры, гласъ 6:

Возвесели сердце наше, Господи Боже нашъ, / во еже боятися Имени Твоего Святаго.[4]/ Внегда призывати намъ Святое Имя Твое[5] / исполни уста наша Твоего хваленiя, / еже подати величествiе / Имени Твоему Святому.[6]/ Iисусе. Спасительное Имя, помилуй мя.[7] (дважды)

Сiе дражайшее Имя Iисусъ / о, коль есть сладко сердцу, любящему Христа Iисуса, / о, коль вожделенно имущему Его. / Iисусъ бо весь желанiе, весь сладость. / Сiе Пресвятое Имя Iисусъ, / о, коль любезно рабу и узнику Iисусову, въ любовь Его плененну: / Во уме Iисусъ, во языце Iисусъ; / Iисусъ веруется сердцемъ въ правду, / Iисусъ исповедуется усты во спасенiе.[8]/ Iисусе Спасительное Имя, помилуй мя. (дважды)

Облобызаемъ убо Тя любезно, / о сладчайшее Имя Iисусъ: /

поклоняемся усердно Пресвятому Имени Твоему, / о, Пресладкiй и Всещедрый Iисусе! / Хвалимъ превеликое Имя Твое, Iисусе Спасе, нашъ: / То бо есть прилепляющемуся къ Нему, / просвещенiе ума, красота души,/ здравiе телу, веселiе сердцу, / и спасенiя надежда.[9] / Iисусе, Спасительное Имя, помилуй мя.

О сладчайшее Имя Iисусъ! / Вскусивъ Его пророкъ вопiетъ: / возлюблю Тя Господи, крепосте моя.[10] / Господь утвержденiе мое.[11] / Вкусивъ Его Петръ глаголетъ: / се мы оставихомъ вся и вследъ Тебе идохомъ.[12] / Вкусили Его святiи мученицы, / и сею сладостiю толико были услаждены, / яко и тяжкихъ мученiй ихъ не убоялися / и самыя ужасныя смерти, / и любезно вопiяли: / кто ны разлучитъ отъ любве Божiя: / скорбь или беда, или мечь, / ни смерть, ни животъ, / зане крепка любы, яко смерть.[13] / Iисусе, Спасительное Имя, помилуй мя.

Слава:

Се Имя Господне идетъ, пророкъ вопiетъ:[14] / но явилось намъ Единородное Слово Божiе, / и видехомъ Славу Его, Славу яко Единороднаго отъ Отца, / исполнь Благодати и истины[15] / «Иже Сый сiянiе Славы и образъ Ипостаси Его, / нося же всяческая Глаголомъ Силы Своея./ Собою очищенiе сотворивъ греховъ нашихъ.[16] / О семъ вси пророцы свидетельствуютъ / оставленiе греховъ прiяти Именемъ Его / всякому верующему въ Онь.[17] Iисусе, Спасительное Имя, помилуй мя.

И ныне: гласъ 2:

Воспойте Господеви песнь нову, / пойте же Имени Боголепно возсiявшему / изъ чрева Неискусобрачныя, / и Сiю вернымъ показавшу / твердую надежду и похвалу.[18] Iисусе, Спасительное Имя, помилуй мя.

Свете тихiй. Прокименъ дне.

1. Въ Воскресенье вечера, Гласъ 8: Се ныне благословите Господа вси раби Господни. Стихъ: Стоящiи во храме Господни, во дворехъ дому Бога нашего.

2. Въ понедельникъ вечера, Гласъ 4: Господь услышитъ мя, внегда воззвати ми къ Нему. Стихъ: Внегда воззвати ми, услыша мя Богъ правды моея.

3. Во вторникъ вечера, Гласъ 1: Милость Твоя, Господи, поженетъ мя, вся дни живота моего. Стихъ: Господь пасетъ мя, и ничтоже мя лишитъ: на месте злачне, тамо всели мя.

4. Въ среду вечера, Гласъ 5: Боже, во Имя Твое, спаси мя, и въ силе Твоей суди ми. Стихъ: Боже, услыши молитву мою, внуши глаголы устъ моихъ. (Псал. 53,3-4).

5. Въ четвергъ вечера, Гласъ 6: Помощь моя отъ Господа, сотворшаго небо и землю. Стихъ: Возведохъ очи мои въ горы, отнюдуже прiидъ помощь моя.

6. Въ пятницу вечера, Гласъ 7: Боже, заступникъ мой еси Ты, и милость Твоя предваритъ мя. Стихъ: Изми мя отъ врагъ моихъ Боже, и отъ востающихъ на мя избави мя.

7. Въ субботу вечера, Гласъ 6: Господь воцарися, въ лепоту облечеся. Стихъ: Облечеся Господь въ силу и препоясася. Стихъ: Ибо утверди вселенную, яже не подвижится. Стихъ: Дому Твоему подобаетъ святыня, Господи, въ долготу днiй.

И чтенiя исповедническiя пять.

Чтецъ: Исхода чтенiе.

И рече Моисей къ Богу: се азъ пойду къ сынамъ Израилевымъ и реку къ нимъ: «Богъ отецъ нашихъ посла мя къ вамъ: и аще вопросятъ мя, что Имя Ему? Что реку къ нимъ? – И рече: тако речеши сыномъ Израилевымъ: Сый посла мя къ вамъ. И рече Богъ паки къ Моисею: тако речеши сыномъ Израилевымъ: Господь Богъ отецъ нашихъ, Богъ Авраамовъ, и Богъ Исааковъ, и Богъ Iаковль посла мя къ вамъ: сiе Мое есть Имя Вечное.[19] Глагола же Богъ къ Моисею и рече ему: «Азъ Господь: и явихся Аврааму, и Исааку, и Iакову, Богъ сый ихъ: Имене Моего Господь, не явихъ имъ.[20] И рече Господь: «Не возьмеши Имене Господа Бога твоего всуе: не очиститъ бо Господь, прiемлющаго Имя Его всуе».[21] Не бо поклонитеся богомъ инымъ: ибо Господь Богъ ревниво Имя, Богъ ревнитель есть.[22] Да покажу на тебе крепость Мою, и яко да проповестся Имя Мое по всей земли.[23]

Втораго закона чтенiе.

Тако глаголетъ Господь: Господа Бога твоего боишися, и Тому Единому послужиши, и къ Нему прилепишися, и Именемъ Его кленешися.[24] Десятины да даси и да снеси я предъ Господомъ Богомъ твоимъ на месте, идеже изберетъ Господь Богъ твой призывати Имя Его тамо. Да принесеши десятину пшеницы твоея… да научишися боятися Господа Бога твоего вся дни: аще же далече будетъ путь отъ тебе, и не возможеши донести ихъ, яко далече место отъ тебе, еже изберетъ Господь Богъ твой, и продаси сiе на цене.[25] «Не возможеши жрети пасху… но токмо на месте, еже изберетъ Господь Богъ твой призывати Имя Его ту.[26] Того (колено Аарона) избра Господь Богъ твой отъ всехъ племенъ твоихъ, предстояти предъ Господомъ Богомъ твоимъ, служити и благословити во Имя Господне, той и сынове его во вся дни… Да служитъ Имени Господа Бога вашего.[27] Пророка возставлю имъ отъ среды братiй ихъ, якоже тебе: и вдамъ Слово Мое во уста его и возглаголетъ имъ, якоже заповедаю ему; и человекъ той, иже не послушаетъ словесъ его, елика возглаголетъ пророкъ оный во Имя Мое, Азъ отмщу отъ него.[28] Аще не послушаете творити вся словеса закона сего, написанныя въ книге сей, еже боятися Имене честнаго и чуднаго сего, Господа Бога твоего. И удивитъ Господь язвы твоя… дондеже потребитъ Тя.[29]

Книги первыя Паралипоменона чтенiе.

Во время оно и весь Израиль взыде во градъ Давидовъ… еже вознести тамо Кивотъ Господа Бога, седяща на херувимехъ, идеже призвано есть Имя Его.[30] Въ той день устрои Давидъ въ начале хвалити Господа рукою Асафа и братiи его: исповедайтеся Господеви, и призывайте Его во Имени Его. Знаемы сотворити людемъ начинанiя Его. Пойте Ему и воспойте Ему: поведите вся чудеса Его, яже сотвори Господь. Хвалите Имя Святое Его.[31] Рече же Давидъ Соломону: чадо мне бяше въ сердце, да созижду домъ Имени Господа моего. И бысть слово Господне ко мне, глаголющее: многи крови пролiялъ еси, и многи брани сотворилъ еси, не созиждеши домъ Имени Моему… Се сынъ родится тебе… той созиждетъ домъ Имени Моему.[32] Возстаните и созидайте Святыню Господу Богу вашему, да внесется Кивотъ Завета Господня, и сосуды святыя Богови въ домъ, созидаемый Имени Господню.[33] И благослови царь Давидъ Господа предъ всемъ множествомъ, глаголя: Благословенъ еси Господи, Боже Израилевъ, Отецъ нашъ отъ века и до века… И ныне, Господи, исповедаемся Тебе и хвалимъ Имя хваленiя Твоего.[34] Господи Боже нашъ, да созиждется домъ Имени Святому Твоему.[35]

Пророчества Исаiина чтенiе.

Тако глаголетъ пророкъ: Се Богъ мой, Спасъ мой… воспойте Имя Его, возвестите во языцехъ славная Его: поминайте, яко вознесеся Имя Его. Хвалите Имя Господне.[36] Господи, Боже нашъ, прославлю Тя, воспою Имя Твое, яко сотворилъ еси чудная дела.[37] Уповахомъ на Имя Твое… Господи Боже нашъ, стяжи ны: Господи, разве Тебе иного не вемы: Имя Твое именуемъ.[38] Се Имя Господне идетъ временемъ многимъ, горящая ярость Его: со славою слово устенъ Его, слово гнева полно.[39] Яко Имя Господне велико вамъ есть.[40] Азъ Господь Богъ, сiе Мое есть Имя, славы Моея иному не дамъ.[41] Васъ ради присно Имя Мое хулится во языцехъ. Сего ради познаютъ людiе мои Имя Мое въ той день, яко Азъ есмь Самъ глаголяй, ту есмь.[42] Господь Саваофъ Имя Ему; избавивый тя, Святый Богъ Израилевъ.[43] И явлено будетъ Имя Твое въ сопротивныхъ Твоихъ.[44] Напоминайте, что велико Имя Его.[45] Услышите Глаголъ Господень трепещущiи словесъ Его: рцыте, братiе, ненавидящимъ вамъ и гнушающимся, да Имя Господне прославится, и явится въ веселiи ихъ, и они посрамятся.[46]