Песнь 8. Iрмосъ:

В пещи отроцы Израилевы, / якоже в горниле / добротою благочестiя чистее злата блещахуся, глаголюще: / благословите вся дела Господня Господа, / пойте, и превозносите во вся веки.

Рече отъ лица Божiя Кириллъ святый: / вы апостоли, Моимъ Именемъ очищающiе прокаженныя, / бесовъ изгоняющiи, мертвыхъ воскрешающiи,/ должни есть разумети, Кемъ совершаете чудеса.[30]

Паки же рече Кириллъ святый: / поелику работаемъ Господеви, / Новое Имя имеемъ. / Толико новое Имя, / еже благословитися на земли, / ибо Имя сiе собою объяло вселенную.[31]

Слава:

Боже праведный и хвальный, / Боже Великiй и крепкiй, / услыши грешнаго мужа молитву въ часъ сей: / и прославлю со ангелы и всеми святыми Твоими Всечестное и Великолепое Имя Твое, / Отца и Сына и Святаго Духа.[32]

И ныне:

Вышняго Бога плотiю Рождшая, / от гноя мя возстави страстей оскорбляющихъ мя / и люте всего обнищавша; / Божественными обогати, Пречистая, добродетельми, / яко да воспою Тя, спасаемь.

Хвалимъ, благословимъ, поклоняемся Господеви поюще и превозносяще во вся веки. Катавасiя.

И поемъ Честнейшую:

Песнь 9. Iрмосъ:

Образъ чистаго рождества Твоего, / огнепалимая купина показа неопальная: / и ныне на насъ напастей свирепеющую угасити молимся пещь, / да Тя Богородице непрестанно величаемъ.

Владыко Господи Боже нашъ, / иже единъ окаянныя моея души недугъ, / и сея исцеленiе ведый, / исцели ю, якоже веси, / настави мя на правый путь Твой, / и сице предстану неосужденно/ предъ страшнымъ престоломъ Твоимъ, / славя и воспевая Пресвятое Имя Твое во веки.[33]

Сего ради и мы раби Твои, молимся, / и дерзающе на незлобiе Твое Человеколюбче, / со страхомъ вопiемъ къ царствiю Твоего Святаго Имене.[34]

Слава:

Господи Боже нашъ. / даждь ми умиленiе къ покаянiю, / да со благою надеждою, и истиннымъ уверенiемъ, / къ тамошнему мiру пойду, / хваля и благословя выну / Всесвятое Имя Твое, / Отца, и Сына, и Святаго Духа.[35]

И ныне:

Iисуса, Богородице, Егоже носила еси, / Едина Неискусомужная Дево Марiе, / Того Чистая, умилостиви, / яко Сына Твоего и Зиждителя,/ избавити притекающiи къ Тебе, / искушенiй и бедъ и огня будущаго.[36]

Катавасiя. Малая ектенiя (если нетъ священника: Господи помилуй 3, и: Аминь).

И поемъ: Святъ Господь Богъ нашъ (трижды)

Светиленъ:

Единъ есть Господь Iисусъ Христосъ, / Имя чудное, ибо Исаiя глаголетъ:/ Се Спаситель твой грядетъ, / имея съ Собою мзду,[37] / сiянiе Славы просвещеннымъ, / и ослепленiе невернымъ.[38]

Слава и ныне: Богородиченъ:

Сiянiемъ, Дево, изъ Тебе возсiявшаго Света, / умъ мой озари, сердце просвети, / тьму греховную отгоняющи, / и мглу лености моея потребляющи.[39]

Поемъ хвалитны: Всякое дыханiе да хвалитъ Господа. Хвалите Господа с небесъ, хвалите Его въ вышнихъ, Тебе подобаетъ песнь Богу.

Хвалите Его вси Ангели Его, хвалите Его вся силы Его. Тебе подобаетъ песнь Богу.

Чтецъ продолжаетъ: Хвалите Его солнце и луна… и проч.

На хвалитехъ стиховны стихиры, гласъ 2:

Восхвалю Имя Бога моего съ песнiю, / возвеличу Его во хваленiи, / и угодно будетъ Богу паче юна тельца, / роги износяща и пазнокти. / Да восхвалятъ Его небеса и земля, / и вся живущая в Немъ. / Яко Богъ спасетъ Сiона, / и любящiи Имя Твое вселятся в Немъ.[40]

Воспойте Богу: / пойте Имени Его.[41]

Хвалите отроцы Господа, / хвалите Имя Господне. / Буди Имя Господне благословенно отъ ныне и до века. / Отъ востокъ солнца до западъ хвально Имя Господне.[42] / Благословенъ Господь Богъ Израилев творяй чудеса Единъ, / и благословенно Имя Славы Его, во векъ и въ векъ века.[43]

Повемъ Имя Твое братiи моей, посреде Церкви воспоюТя.[44]

Да восхвалятъ Имя Его въ лице, / въ тимпане и псалтири да поют Ему.[45]/ Благословлю Имя Твое во векъ и въ векъ века. / На всякъ день благословлю Тя / и восхвалю Имя Твое во векъ и въ векъ века. / Хвалу Господню возглаголютъ уста моя: / и да благословитъ всяка плоть Имя Святое Его, / во векъ и въ векъ века.[46]

Слава, и ныне:

Избавительнице крепкая на Тя надеющимся, / къ тихому пристанищу Божественнаго хотенiя / настави мя Богородице, / Матернимъ Твоимъ дерзновенiемъ, / еже имаши къ Сыну Твоему, Богоневесто.[47]

Славословiе великое.

Тропарь, гласъ 8:

Съ высоты принесеся Имя Твое Iисусе, Спасе нашъ, / на наше избавленiе во искупленiе рода человеческаго. / Отъ Твоего Имени Iисусе, трясется адъ. / Мы же призываемъ Имя Твое, Iисусе, / и симъ пресладким Именемъ даруй намъ спасенiе.[48]

Слава и ныне: Богородиченъ, гласъ 6:

Се Дева прiиметъ во чреве / и родитъ Сына / и нарекутъ Имя Ему Еммануилъ,[49] / еже есть Искупитель отъ века, / якоже глаголетъ Исаiя; [50]/ Iисусъ бо, по времени, совершилъ еси Искупленiе.

Ектенiя: Господи помилуй 12, и: Аминь.

Утверди Боже, святую православную веру, православныхъ христiанъ во векъ века.

И часъ 1-й.

По молитве 1-го часа: Взбранной Воеводе победительная:

Слава и Ныне: Господи помилуй (трижды). Благослови.

Молитвами святыхъ отецъ нашихъ, Господи Iисусе Христе Боже нашъ, помилуй нас. Аминь.

Часы

3-й часъ начинается: Молитвами святыхъ отецъ нашихъ, Господи Iисусе Христе Боже нашъ, помилуй насъ. Аминь.,

Начало обычное: Трисвятое по Отче нашъ: Господи помилуй, 12. Слава и ныне: Прiидите поклонимся: трижды.

На часехъ: тропари и кондаки пременяюще, сiи.

Тропарь. гласъ 8:

Съ высоты принесеся Имя Твое Iисусе Спасе нашъ, / на наше избавленiе во искупленiе рода человеческаго. / Отъ Твоего Имени Iисусе, трясется адъ. / Мы же призываем Имя Твое, Iисусе, / и симъ пресладким Именемъ даруй намъ спасенiе.[51]

инъ Тропарь, гласъ 4:

Придите почерпите воду съ веселiем отъ источника спасенiя. / Хвалите Господа, воспойте Имя Его, / возвестите во языцехъ славная Его: / поминайте, яко вознесеся Имя Его. / Хвалите Имя Господне, яко высокая сотвори Господь: / возвестите сiя по всей земли.[52] / Iисусе Спасительное Имя, помилуй мя.

Кондакъ, гласъ 6:

Царское Имя Iисусъ / на небеси и на земли царствующее: / на небеси все естество Ангельское / безпрестанно славит Пресвятое Имя Твое, Iисусе,[53] / на земли людiе возносятъ туюжде песнь, / составляется общее торжество / Небесных и земных существ вкупе славящих Тя. / Iисусе, Спасительное Имя, помилуй мя.[54]

ин Кондакъ, гласъ 6:

Имя Твое Iисусе Спасе нашъ, / аки солнце мiр облеста, / аки мvро благовонное вселенную облагоуха: / удиви Ангеловъ, обрадова человековъ, / устраши бесовъ, / прогоняется мракъ имеборчества, / благочестiя же Имяславия возсiяваетъ светъ, / и просвещаетъ всякаго человека, въ мiръ грядущаго.[55]

Въ начале Литургiи и Изобразительной

полагается заздравная Ектенiя. Если без iерея, Господи помилуй 12 разъ, и поминаются сущiи въ правой вере. О еретикахъ или находящихся въ общенiи съ имеборной антицерковью, равно и о неверующихъ, молиться положено не «спаси Господи» а: вразуми, и обрати ихъ, Господи, къ правой вере и къ покаянiю.

Последованiе Изобразительныхъ:

Благослови душе моя Господа:

Слава: Хвали душе моя Господа:

И ныне: Единородный Сыне:

Блаженны. Во царствiи Твоемъ:

На Блаженныхъ тропари отъ Канона на 4, песнь 3 и 6.

Слава:

Сiе Имя Спасительное Iисусъ, / аки солнце мiръ облеста,/[56] глаголющу пророку: / возсiяетъ вамъ боящимся Имене Моего солнце правды / и исцеленiе въ крылехъ Его / и изыдете и взыграете / якоже тельцы отъ узъ разрешеннiи.[57] / Iисусе, Спасительное Имя, помилуй мя.

И ныне:

Се Дева приметъ во чреве / и родитъ Сына / и нарекутъ Имя Ему Еммануилъ,[58] / еже есть Искупитель отъ века, / якоже глаголетъ Исаiя; [59]/ Iисусъ бо, во времени, совершилъ еси Искупленiе.

И поемъ: Прiидите поклонимся / и припадем ко Христу, / спаси ны, Сыне Божiй, / во святыхъ дивенъ сый поющiя Ти / аллилуiа, аллилуiа, аллилуiа.

Аще въ неделю, вместо: «во святыхъ дивенъ сый», поется: «воскресый изъ мертвыхъ» поющiя Ти аллилуiа. И тропари:

Тропарь Имени Божiю, гласъ 4:

Сiя глаголетъ Богъ Вседержитель: / Азъ Господь Богъ, сiе Вечное Имя Мое[60].[61]/ Живу Азъ, и присно живетъ Имя Мое.[62] / И ныне заповедь сiя къ вамъ священницы: / аще не примете къ сердцу вашему / воздавати славу Имени Моему, / прокляну васъ и благословенiе ваше, / и уже проклинаю, / яко не хотите приложить къ тому сердца.[63]

инъ Тропарь, гласъ 4:

Вамъ, благоговеющимъ предъ Именемъ Моимъ, / глаголетъ Господь Вседержитель, / взойдетъ солнце правды и исцеленiе въ лучахъ его, / и выйдете и взыграете, яко тельцы отъ узъ разрешенiи: / попиратися имуть нечестивiи, / будутъ бо прахомъ под стопами вашими, / въ день, воньже Азъ сотворю.[64] / О боящихся же Бога и чтущихъ Имя Его / предъ лицемъ Его пишется памятная книга.[65].[66]

Сладчайшему Имени Iисусъ Христову:

Тропарь, гласъ 8:

Съ высоты принесеся Имя Твое Iисусе, Спасе нашъ, / на наше избавленiе во искупленiе рода человеческаго. / Отъ Твоего Имени Iисусе, трясется адъ. / Мы же призываемъ Имя Твое, Iисусе, / и симъ пресладким Именемъ даруй намъ спасенiе.[67]

инъ Тропарь, гласъ 6:

Придите почерпите воду с веселiем отъ источника спасенiя. / Хвалите Господа, воспойте Имя Его, / возвестите во языцех славная Его: / поминайте, яко вознесеся Имя Его. / Хвалите Имя Господне, / яко высокая сотвори Господь: / возвестите сiя по всей земли.[68] / Iисусе, Спасительное Имя, помилуй мя.

Покрову Пресвятой Богородицы.

Тропарь, гласъ 4:

Днесь благовернiи людiе светло празднуемъ, / осеняеми Твоимъ Богомати пришествiемъ, / и къ Твоему взирающе пречистому Образу, умильно глаголемъ: / покрый насъ честнымъ Твоимъ Покровомъ: / и избави насъ отъ всякаго зла, / молящи Сына Твоего Христа Бога нашего, / спасти души наша.

И тропари: дневной, и по месяцеслову на числе.

И поемъ: Трисвятое.

Чтецъ: Прокименъ, гласъ 4:

Боже, во Имя Твое, спаси мя. и въ силе Твоей суди ми.[69]

Ликъ: Боже, во Имя Твое, спаси мя. и въ силе Твоей суди ми

Чтецъ, Стихъ: Пойте Богу нашему, пойте Имени Его, яко добро.[70]

Ликъ: Боже, во Имя Твое, спаси мя, и въ силе Твоей суди ми.

Чтецъ: Боже, во Имя Твое спаси мя.

Ликъ: и въ силе Твоей суди ми.

Апостолъ: къ Филипписiемъ, зач. 240.

Чтецъ: къ Филипписiемъ посланiя святаго Апостола Павла чтенiе. Братiе, Сiе бо да мудрствуется въ васъ, еже и во Христе Iисусе: Иже, во образе Божiи сый, не восхищенiемъ непщева быти равенъ Богу: Но Себе умалилъ, зракъ раба прiимъ, въ подобiи человечестемъ бывъ, и образомъ обретеся, якоже человекъ, Смирилъ Себе, послушливъ бывъ даже до смерти, смерти же крестныя. Темже и Богъ Его превознесе, и дарова Ему Имя, еже паче всякаго имене; Да о Имени Iисусове всяко колено поклонится небесныхъ и земныхъ и преисподнихъ, И всякъ языкъ исповесть, яко Господь Iисусъ Христосъ во славу Бога Отца, Аминь. И глаголет: аллилуiа, аллилуiа, аллилуiа.

Ликъ: трижды: аллилуiа.

Чтецъ, стихъ: Господи, Имя Твое въ векъ, и память Твоя въ родъ и родъ.[71] (После каждого стиха клиръ поетъ трижды: аллилуiа)

Стихъ: Имени Твоего ради, Господи, живи мя,[72] и прославлю Тя.

Стихъ: Воспойте Богу, пойте Имени Его. [73]