И ныне: Богородиченъ, гласъ 4:

Красоте девства Твоего, / и пресветлой чистоте Твоей, / Гаврiил удивися, вопiяше Ти Богородице: / кую Ти похвалу принесу достойную; / что же возименую Тя; / недоумеваю и ужасаюся. / Темъ же яко повеленъ быхъ, вопiю Ти: / Благодатная радуйся.

Свете тихiй. Прокименъ дне.

1. Воскресенье вечера, Гласъ 8: Се ныне благословите Господа вси раби Господни. Стихъ: Стоящiи во храме Господни, во дворехъ дому Бога нашего.

2. Понедельникъ вечера, Гласъ 4: Господь услышитъ мя, внегда воззвати ми къ Нему. Стихъ: Внегда воззвати ми, услыша мя Богъ правды моея.

3. Вторникъ вечера, Гласъ 1: Милость Твоя, Господи, поженетъ мя, вся дни живота моего. Стихъ: Господь пасетъ мя, и ничтоже мя лишитъ: на месте злачне, тамо всели мя.

4. Среда вечера, Гласъ 5: Боже, во Имя Твое, спаси мя, и въ силе Твоей суди ми. Стихъ: Боже, услыши молитву мою, внуши глаголы устъ моихъ.[3]

5. Четвергъ вечера, Гласъ 6: Помощь моя отъ Господа, сотворшаго небо и землю. Стихъ: Возведохъ очи мои въ горы, отнюдуже прiидетъ помощь моя.

6. Пятница вечера, Гласъ 7: Боже, заступникъ мой еси Ты, и милость Твоя предваритъ мя. Стихъ: Изми мя отъ врагъ моихъ Боже, и отъ востающихъ на мя избави мя.

7. Суббота вечера, Гласъ 6: Господь воцарися, въ лепоту облечеся. Стихъ: Облечеся Господь въ силу и препоясася. Стихъ: Ибо утверди вселенную, яже не подвижится. Стихъ: Дому Твоему подобаетъ святыня, Господи, въ долготу днiй.

Чтенiя три.

Соборнаго посланiя Iоаннова чтенiе.[4]

Возлюбленнiи, аще сердце наше не зазритъ намъ, дерзновенiе имамы къ Богу. И Егоже аще просимъ, прiемлемъ отъ Него: яко заповеди Его соблюдаемъ, и угодная предъ Нимъ творимъ. И сiя есть заповедь Его, ДА ВЕРУЕМЪ ВО ИМЯ СЫНА ЕГО IИСУСА ХРИСТА, и любимъ другъ друга, якоже заповедь далъ есть намъ. И соблюдаяй заповеди Его, въ Немъ пребываетъ, и Той въ немъ: и о семъ разумеемъ, яко пребываетъ въ насъ, отъ Духа, Егоже далъ есть намъ. Возлюбленнiи, не всякому духу веруйте, но искушайте духи, аще отъ Бога суть: яко мнози лжепророцы изыдоша въ мiръ. О семъ познавайте Духа Божiя и духа лестча. Всякъ духъ, иже исповедуетъ Iисуса Христа во плоти пришедша, отъ Бога есть. И всякъ духъ, иже не исповедуетъ Iисуса Христа во плоти пришедша, отъ Бога несть: и сей есть антихристовъ, Егоже слышасте яко грядетъ, и ныне въ мiре есть уже. Вы отъ Бога есть, чадца, и победисте техъ, яко болiй есть иже въ васъ, нежели иже въ мiре. Они отъ мiра суть, сего ради отъ мiра глаголютъ, и мiръ техъ послушаетъ. Мы отъ Бога есмы: иже знаетъ Бога, послушаетъ насъ: и иже несть отъ Бога, не послушаетъ нас.

Соборнаго посланiя Iоаннова чтенiе.[5]

Возлюбленнiи, аще сице возлюбилъ есть насъ Богъ, и мы должни есмы другъ друга любити. Бога никтоже нигдеже виде: Аще другъ друга любимъ, Богъ въ насъ пребываетъ, и любы Его совершенна есть въ насъ. О семъ разумеемъ, яко въ Немъ пребываемъ, и Той въ насъ, яко отъ Духа Своего далъ есть намъ. И мы видехомъ и свидетельствуемъ, яко Отецъ посла Сына Спасителя мiру. Иже аще исповесть, яко Iисусъ есть Сынъ Божiй, Богъ въ немъ пребываетъ, и той въ Бозе. И мы познахомъ, и веровахомъ любовь, юже имать Богъ въ насъ. Богъ любы есть, и пребываяй въ любви, въ Бозе пребывает, и Богъ въ немъ пребываетъ.

Соборнаго посланiя Iоаннова чтенiе.[6]

Возлюбленнiи, аще кто речетъ, яко люблю Бога, а брата своего ненавидитъ, ложь есть: ибо не любяй брата своего, Егоже виде, Бога, Егоже не виде, како можетъ любити? И сiю заповедь имамы отъ Него, да любяй Бога любитъ и брата своего. Всякъ веруяй, яко Iисусъ есть Христосъ, отъ Бога рожденъ есть: и всякъ любяй рождшаго любитъ и рожденнаго отъ него. О семъ вемы, яко любимъ чада Божiя, Егда Бога любимъ и заповеди Его соблюдаем: и заповеди Его тяжки не суть. Яко всякъ рожденный отъ Бога побеждаетъ мiръ: и сiя есть победа побеждшая мiръ, вера наша. Кто есть побеждаяй мiръ, токмо веруяй, яко Iисусъ есть Сынъ Божiй.

На стиховне стихиры, гласъ 6:

Училъ еси, отче святый, Iоанне, / яко ничтоже могущественне молитвы, / ни чимъ тако благоугождается Богъ, / якоже молитвою, / въ ней бо заповедей Божiихъ исполненiе, / въ молитве же и любовь ко Господу, / паче всехъ добродетелей суть молитва. / Научи насъ грешныхъ, отче Iоанне, / истинно молитися ко Господу / о спасенiи душъ нашихъ, / святыми твоими молитвами.

Господи, Имя Твое въ векъ, и память Твоя в родъ и родъ.

Поучалъ еси отче Iоанне, / яко добродетелей совокупность молитва есть, / о ней же небрегущихъ / постигнетъ тяжкое забвенiе и прочихъ заповедей. / Молися ко Господу, отче Iоанне, / да не оставимъ заповедь о молитве, / да соблюдаемъ въ ней все заповеди, / святыми отче твоими молитвами.

Господи Господь нашъ, яко чудно Имя Твое по всей земли!

Училъ еси отче Iоанне святый, / драгоценнее всего есть молитва, / не затискивай сiю въ дальнiй угол, / не ограничивай ю остатками времени дня, / время бо посвященное Богу не даромъ пропадетъ, / въ долгу бо не останется Богъ, / воздастъ наградою за молитву. / Молися отче о насъ, / да даруетъ Господь молитву намъ благовременную, / святыми твоими молитвами.

Слава: гласъ 2:

Прiидите вси вернiи, / восхвалимъ органъ Духа Святаго, / ублажимъ наставника благочестiя, / врача скораго душъ и телесъ нашихъ, / цветы словесъ благоуханныхъ прославимъ, благодати тезоименитаго Iоанна праведнаго, / благовестника Божества Имени Божiя, / светозарнаго светильника Церкви Россiйскiя, / трубу богогласную, / и тако ему возопимъ: / радуйся девственная похвало, / радуйся наставниче Боговеденiя: / радуйся подвижниче веры и благочестiя, / радуйся Россiи просвещенiе, / слава всего мiра сего, / дерзновенный молитвенниче о душахъ нашихъ.

И ныне: гласъ 2:

Пречистая Дево, помилуй насъ, / прибегающихъ верою къ Тебе милосердней / и просящихъ теплаго Твоего заступленiя: / яко Мати Бога Вышняго, / моли Сына Твоего, Христа Бога нашего, / спастися рабомъ Твоимъ

Ныне отпущаеши: Трисвятое, по Отче нашъ:

Тропарь, гласъ 4:

Дивный пастырь показался еси, / богоблаженне Iоанне Кронштадтскiй, / подобный великимъ святителямъ въ лике святыхъ просiявшимъ, / чрезъ нихъ же благодать Христа Бога воспрiялъ еси: / недуги душевныя и телесныя исцеляти, / малодушныя утешати, / ленивыя на покаянiе воздвизати, / заблудших къ Православiю наставляти, / благочестивыя въ Таинстве причащенiя со Христомъ соединяти. / Сего ради любовiю ублажаемъ тя, / молящагося о душахъ нашихъ.

инъ Тропарь, гласъ 4:

Во Христе во веки живый чудотворче, / любовiю милуя сущихъ въ бедахъ: / слыши чада твоя верою тя призывающихъ, / щедрыя помощи от тебе чающихъ, / Iоанне Кронштадтскiй возлюбленный пастырю наш.

Богородице Дево радуйся:

Ликъ: Буди Имя Господне благословенно отъ ныне и до века. (трижды). Чтецъ: Благословлю Господа на всякое время (псал. 33) до: не лишатся всякаго блага. И: Шестопсалмiе.

На утрени, по шестопсалмiи:

Ектенiя (Господи помилуй 12 разъ, и: Аминь)

Богъ Господь, и явися намъ: (на гласъ тропаря)

Тропарь, гласъ 4:

Дивный пастырь показался еси, / богоблаженне Iоанне Кронштадтскiй, / подобный великимъ святителямъ въ лике святыхъ просiявшимъ, / чрезъ нихъ же благодать Христа Бога воспрiялъ еси: / недуги душевныя и телесныя исцеляти, / малодушныя утешати, / ленивыя на покаянiе воздвизати,/ заблудших к Православiю наставляти, / благочестивыя въ Таинстве причащенiя со Христомъ соединяти. / Сего ради любовiю ублажаемъ тя, / молящагося о душахъ нашихъ.

Слава: инъ Тропарь, гласъ 8:

Праведникъ Божiй и всемiрный чудотворче / молитвенникъ, предивный и целитель пресладостный, / притекавшихъ къ тебе недужныхъ множестыо, / молитвою ты ихъ исцелялъ еси. / Даруй и мне скорое исцеленiе / душевное же и телесное: / падшему во многiя и тяжкiя грехи, / испроси у Бога согрешенiй моихъ прощенiе, / любимый нашъ отче Iоанне, / и молися ко Господу спастися душамъ нашимъ.

И ныне: Богородиченъ, гласъ 5:

Утоли болезни души моея, / утолившая всякую слезу отъ лица земли, / Ты бо человековъ болезни отгониши, / и грешныхъ скорби разрушаеши, / Тебе бо вси стяжахомъ въ напастех надежду и утвержденiе, / Пресвятая Мати Дево.

Ликъ: Господи помилуй, Господи помилуй, Господи помилуй, слава Отцу и Сыну и Святому Духу.

Чтецъ: И ныне и присно и во веки вековъ, аминь.

И стихословимъ кафизмы, (По уставу).

По 1-й Кафизме, седаленъ, гласъ 4:

Ты отче, Iоанне, поучалъ еси, / яко помыслиши токмо съ Богомъ соединитися, / и абiе съ тобою Онъ, / ничтоже претитъ соединенiю сему, / такожде Ангели Святiи предъ очима твоими сердечными, / яко же сами они, присные друзья твои. / О, Господи Боже нашъ! / Сподоби насъ грешныхъ дара сего высочайшаго / въ молитвахъ съ Тобою соединитися, / святыми молитвами отца нашего Iоанна.

Слава и ныне: Богородиченъ, гласъ 4:

Къ Богородице прилежно ныне притецемъ, / грешнiи и смиренiи и припадемъ / въ покаянiи зовуще изъ глубины души: / Владычице помози на ны милосердовавши: / потщися погибаемъ отъ множества прегрешенiй, / не отврати Твоя рабы тщи, / Тя бо едину надежду имамы.

По 2-й Кафизме, седаленъ, гласъ 6:

Ты еси, Отче Iоанне поучалъ еси, / яко вси земнороднiи, / великимъ для себя даромъ почитать должни, / молитвою беседу съ Господомъ Богомъ, / Пресвятою Богородицею, / и Святыми человеками, / сего ради молитися в трепетномъ благоговеинстве, / памятовати же съ кемъ беседуши непотребная червь, / иже честь человеку дружба съ царемъ, / паче же великая честь человеку, / имети дружбу съ Царемъ царей, / безсмертнымъ и нетленнымъ Царемъ вековъ,[7]/ и наслаждатися чудныя доброты и красоты Его, / мира, сладости и блаженства, / правды и святыни Его. / О Господи, сподоби насъ грешныхъ сiя милости Твоея, / святыми молитвами отца нашего Iоанна.

Слава и ныне: Богородиченъ, гласъ 4:

Живоносный источниче, / Богородице Дево, / зноемъ страстей палимую душу мою, / напой благодатными струями Сына Твоего, / и услади горесть сердца моего, / зренiемъ Святаго образа Твоего.

Полiелей: (Прославленiе Бога во Имени Его)

Ликъ поетъ: Хвалите Имя Господне, хвалите раби Господа: Аллилуiа, аллилуiа, аллилуiа.[8]

Благословенъ Господь отъ Сiона, живый во Iерусалиме. Аллилуiа, аллилуiа аллилуiа.

Исповедайтеся Господеви, яко благъ яко въ векъ милость Его. Аллилуiа, аллилуiа, аллилуiа.

Исповедайтеся Богу небесному яко въ векъ милость Его. Аллилуiа, аллилуiа, аллилуiа.

Величанiе:

Величаемъ тя, / преподобне отче Iоанне Богоносне, / и чтемъ святую память твою, / наставниче всех ко спасенiю, / и собеседниче Ангеловъ.

Псаломъ избранный: Воспойте Господеви, / пойте Имени Его.[9]

Величаемъ:

Ины псалмы избранные: Свято и страшно / Имя Его.[10]

И хвально и прославленно / Имя Твое во веки[11]

Господи, посли благодать Твою въ помощь мне, / да прославлю Имя Твое Святое![12]

Услышитъ Тя Господь въ день печали, / защититъ Тя Имя Бога Iаковля[13]

Повемъ Имя Твое братiи моей, / посреде церкви воспою Тя.[14]

Господи, Господь нашъ, / яко чудно Имя Твое по всей земли![15]

Величаемъ:

По Имени Твоему, Боже, тако и хвала Твоя / на концах земли.[16]

Да разумеютъ языцы, / яко Имя Тебе – Господь[17]

И да уповаютъ на Тя, / знающiе Имя Твое[18]

Восхвалю Имя Бога моего съ песнiю, / возвеличу Его во хваленiи.[19]

Будетъ Имя Его благословенно во веки, / прежде солнца пребываетъ Имя Его.[20]

Величаемъ:

Людiе безумнiи / хулятъ Имя Твое.[21]

Нищъ и убогъ / восхвалита Имя Твое.[22]

Азъ Господь Богъ, / сiе есть Имя Мое.[23]

Живу Азъ, / и присно живетъ Имя Мое.[24]

Господь Богъ Саваофъ / Имя Ему.[25]

Пойте Имени Его, / яко добро.[26]

Хвалите Имя Господне, / хвалите раби Господа![27]

Всякое дыханiе, / да хвалитъ Господа![28]

Чтецъ: Слава, и ныне: Аллилуiа, аллилуiа, аллилуiа слава Тебе Боже (дважды). 3-й раз Аллилуiа поется протяжно.

и паки: Величаемъ:

(Величанiе поется, сколько хочется разъ).