Слава Ему во веки!

Аминь.

Акафистъ

Святому Чудотворцу отцу Iоанну

Кронштадтскому.

(Память: 19 октября – Рождество и день Ангела;

20 декабря – кончина).

Кондакъ 1

Избранный угодниче и преславный чудотворче, / добрый пастырь и пламенный о мiре молитвенниче, / хвалебное отъ любве нашея возсылаемъ ти пенiе; / ты же яко имеяй молитвенное дерзновенiе ко Господу; / отъ всякихъ насъ бедъ свободи умильно поющихъ ти: / Радуйся отче Iоанне треблаженне, / всемiрный светильниче Церкви Хритовой.

I к о с ъ 1

Ангелъ во плоти и Светильникъ Церкви Христовой явился еси праведникъ великiй Iоанне, ангельское бо неподражаемое житiе показалъ еси въ мiре семъ, тем же удивишася чини ангельстiи непорочному житiю твоему, и по преставленiи твоемъ съ веселiемъ прiяша душу твою. Сего ради и мы недостойнiи, радуяся о высоком житiи твоемъ, по силе нашей прославляемъ тя:

Радуйся, всеблаженне отче Iоанне, яко подвигомъ добрымъ подвизался еси въ жизни сей, и праведно скончавъ земное житiе свое, вселился еси въ покоище небесное;

Радуйся, яко во обителехъ премирныхъ, ихъ же уготова Богъ любящимъ Его и прославляющимъ Пресвятое Имя Его[1] въ нескончаемые веки соводворился еси;

Радуйся, яко и Царь царствующихъ за велiю твою ревность о Славе Святейшаго Имени Его,[2] достойно тя сотвори прiятiя Небеснаго Царствiя;

Радуйся, яко и ты прославленъ Богомъ еще на земли и на небеси со ангелы и всеми святыми Имя Святыя Троицы во веки прославляеши;

Радуйся, яко съ преподобными, мученики и всеми святыми выну предстоиши престолу Господню и молитвы возсылаеши Богу въ Троице о почитающихъ память твою;

Радуйся, яко сподобился еси зрети Пресвятую Троицу непосредственне;

Радуйся, яко неизреченную Славу Господню явственно созерцаеши;

Радуйся, яко сподобился еси быти причастником неизреченной Славы Пресвятой Троицы;

Радуйся, Отче Iоанне треблаженне, всемiрный Светильниче Церкви Христовой!

Кондакъ 2.

Видяще винопiйцъ зело страждущихъ, теломъ и душею изнемогающихъ, и близъ конечнаго паденiя сущихъ, умилився милосердствова, явился и исцелилъ техъ недуги; сице и о мне умилосердися, подвижниче Божiй любвеобильный, недугующемъ душею и теломъ, и исцели грехолюбивую душу мою, наставляя мя ко спасенiю, немоществующее тело мое укрепи, да воспою бодренно и въ умиленiи Спасителю моему: Аллилуiа.

I к о с ъ 2.

Разумети хотяще люди страны Россiйскiя равноапостольное служенiе твое, имя твое восхваляютъ народы вселенной, прославляя дивнаго во Святыхъ Своихъ Бога, и похвальные глаголы вещаху о имени твоемъ вопiюще:

Радуйся, великiй Праведникъ Божiй, въ чудесехъ яко светозарная денница возсiявшiй;

Радуйся, въ равносвятительстве твоемъ добрый и верный рабе Господень, облагоухавшiй весь мiръ твоими чудесы;

Радуйся, целебниче недуговъ всехъ съ верою имя твое призывающихъ;

Радуйся, яко и прежде прошенiя помощiю предваряеши;

Радуйся, яко недоумевающихъ о тебе и о твоей прославленной праведности вразумляеши;

Радуйся, яко разслабленныхъ верою укрепляеши;

Радуйся, яко слепымъ душевно прозренiе даруеши;

Радуйся, яко хромыхъ верою хожденiя крепкаго сподобляеши;

Радуйся, Богоугодниче Христовъ, молитвенное дерзновенiе имеющiй;

Радуйся, одержимыхъ отъ бесовъ свободителю;

Радуйся, скорбныхъ милостивый утешителю;

Радуйся, нищихъ милосердный обогатителю;

Радуйся, обездоленных сирот любвеобильный покровителю;

Радуйся, отче Iоанне треблаженне всемiрный Светильниче Церкви Христовой!

Кондакъ 3

Сила Всевышняго утверди тя въ Богоугодномъ и святомъ твоемъ житiи, подвигомъ веры и благочестiя подвизался еси о спасенiи душъ человеческихъ, въ непрестанныхъ молитвахъ твоихъ къ Богу пламенно день и ночь, воспевая: Аллилуiа.

I к о с ъ 3

Слышавши вселенная великое твое ученiе о Имени Пресвятыя Троицы: «Имя Божiе есть Самъ Богъ»,[3] яко громъ возглашенное съ высоты Богодухновеннаго твоего Богословiя, песненно ти возглашаетъ:

Радуйся, дерзновенный Богопроповедниче веры Христовой;

Радуйся, неутомимый садоделателю на ниве Православiя;

Радуйся, чудесно спасшiй островъ веры Христiанской;

Радуйся, грозный обличителю крамолы и безбожiя;

Радуйся, пророчески предсказавшiй гневъ Божiй на Россiю;

Радуйся, возвестителю близъ грядущаго Втораго Пришествiя Христова.

Радуйся, примирителю неправедно враждующихъ;

Радуйся, сердобольный отецъ, избавляющiй отъ греховъ нашихъ;

Радуйся, пастырю добрый, изъ тьмы греховной наставившiй на путь правоверiя и въ благочестiи укрепившiй люди заблудшiя;

Радуйся, мудрый наставниче на жизнь спасительную;

Радуйся, адаманте и столпъ непоколебимый Православiя;

Радуйся, яко истиннымъ православнымъ Богословiемъ Имени Божiя, имяборцевъ вконецъ изобличилъ еси;[4]

Радуйся, яко сущихъ враговъ Церкви Христовой навеки победилъ еси;

Радуйся, яко брани за Имя Господне во Святей горе Афонстей яснозрителю;[5]

Радуйся, инокамъ Святыя Горы Афонскiя венцев мученических предсказателю;[6]

Радуйся, великiй и дивный чудотворче;

Радуйся, отче Iоанне треблаженне, всемiрный Светильниче Церкви Христовой!

Кондакъ 4

Буря недоуменiй смущаетъ мя, како возмогу достойно воспети чудеса Твоя, великiй Праведниче Божiй отче Iоанне Кронштадтскiй: многихъ твоихъ чудотворенiй дары никтоже можетъ воспети по достоинству; но обаче дивно прославльшаго тя Бога прославляю богокрасною песнiю: Аллилуiа.

I к о с ъ 4

Слышавши, пламенный молитвенниче, отче Iоанне, о дивныхъ и великихъ делахъ твоихъ, яко всесильнымъ молитвеннымъ ходатайствомъ твоимъ, сущихъ въ бедахъ скоро предваряеши, сего ради похвальная ти воспеваемъ:

Радуйся, избавленiе наше отъ скорби и печали;

Радуйся, яко предстательствомъ твоимъ даруется духовная Благодать всемъ съ верою призывающимъ Тя;

Радуйся, яко твоими молитвами козни нечистыхъ духовъ разрушаются;

Радуйся, стяжавшiй обилiе благодатныхъ даровъ целебныхъ;

Радуйся, въ стране Россiйской возсiявшiй хранителю чистоты веры Православной;

Радуйся, яко исповедниковъ Божества Имени Божiя зело укрепляеши в вере;[7]

Радуйся, малодушныхъ въ непоколебимой вере утвержденiе и утешенiе;

Радуйся, яко дивнымъ ученiемъ твоимъ о Имени Господнемъ православные христiане в истинномъ исповеданiи укрепляются;

Радуйся, недужныхъ скорое вспоможенiе и исцеленiе;

Радуйся, наставниче грешниковъ на путь покаянiя;

Радуйся, нечаянная надежда отчаянныхъ въ беде сущихъ;

Радуйся, отче Iоанне треблаженне, всемiрный Светильниче Церкви Христовой!

Кондакъ 5

Пресветлой звездой явился еси, великiй праведникъ Божiй, дорогой Батюшка сердобольный отче Iоанне, сущихъ во тьме умныя очи озаряя светомъ Евангелiя Христова, избавляя заблудшихъ сетей вражiихъ, наставляя всехъ въ разуме сущихъ благодарственно съ лики святыхъ воспевати Христу Богу: Аллилуiа.

I к о с ъ 5

Видеша въ твоемъ равноангельномъ житiи неисчерпаемое море благодатныхъ даровъ Святаго Духа, прославляемъ прославльшаго тя Господа, и тебе съ любовiю возсылаемъ хвалебные гласы сiя:

Радуйся, яко странник и пришлецъ пожилъ еси въ мiре семъ;

Радуйся, яко не стяжалъ еси тленнаго богатства на земли;

Радуйся, яко расточалъ еси неимущимъ все именiе свое;

Радуйся, яко стяжалъ еси сокровище себе вечное въ чертогахъ райскихъ на небеси;

Радуйся, яко ангел живя на земли, во Христе пребывалъ еси;

Радуйся, яко непороченъ бывъ, Христа вселилъ еси в душу твою;

Радуйся, яко Пресвятая Троица сотвори тя обителiю Своею;

Радуйся, яко кротостiю къ озлобляющимъ тя унаследовалъ еси землю живыхъ;

Радуйся, яко мудрою мыслiю утвердилъ еси душу твою во спасенiе;

Радуйся, неистощимый источниче потоковъ благодати Господней;

Радуйся, яко и на небеси сподобился еси быти великимъ праведникомъ въ нескончаемыя веки;

Радуйся, яко одесную предстоиши у престола Вседержителя;

Радуйся, яко выну прославляеши пречудное Имя Пресвятыя Троицы;[8]

Радуйся, яко не сокрылъ еси Богомъ вверенный тебе талантъ, но тысящекратно прiумножилъ его;

Радуйся, яко и мы утешаемся ныне избраннымъ твоимъ стадомъ верныхъ тебе и истинному Православiю;

Радуйся отче Iоанне треблаженне, всемiрный светильниче Церкви Христовой!

Кондакъ 6

Праведникъ Божiй и великiй чудотворче Богоносный отче нашъ Iоанне Богохвальный, яко всемiрный светильниче Церкви Христовой, показалъ еси мiру жизнь во Христе, воскресивъ по Его святому Евангелiю жизнь въ душахъ умервщленныхъ грехами; темже возбудивъ зависть древней злобы, многiя поношенiя отъ враговъ претерпелъ еси: насъ же въ Православномъ исповеданiи и прославленiи Имени Божiя укрепилъ еси, вопiющих Ему: Аллилуiа.

I к о с ъ 6

Возсiялъ еси велiе просвещенiе светлостiю чудесъ твоихъ, великiй праведникъ Божiй Iоанне, отъ святыхъ делъ твоихъ истекающихъ, и темъ далече отгналъ еси тьму ересей и расколовъ въ стране, идеже въ правоверiи и благочестiи подвизался еси ревнителемъ бывъ чистоты Православiя, возбранилъ еси соединенiе съ латинскою верою, и темъ спасъ остатокъ Православiя; ныне же, аки почилъ еси отъ трудовъ твоихъ тяжкихъ, въ небесномъ селенiи, со святыми въ лонех Авраамлихъ; мы же чада твоя, чудящеся взываемъ ти сице:

Радуйся, непреоборимый щитъ и огражденiе Церкви Христовой от ересей и раскола;

Радуйся, огнепламенный мечъ, посецающiй тьму имеберчества;

Радуйся, блистающая звезда путеводствующая заблудшихъ ко спасенiю;

Радуйся, светозарный светильниче просвещающiй сущихъ во тьме погибельной;

Радуйся, могущественный искоренителю злохульной имеборческой ереси;[9]

Радуйся, правило веры и благочестiя;

Радуйся, крепкiй защитниче Славы и Чести Имени Божiя;

Радуйся, стена и огражденiе Церкви Христовой отъ развратныхъ хульниковъ Вседержавнаго Имени Спаса нашего;

Радуйся, скорый поборниче борющимся и ныне противъ хулы Имени Господня;

Радуйся, противниковъ Святыя Церкве посрамителю;

Радуйся, злыхъ волковъ от стада Божiя прогонителю;

Радуйся, истинный воинъ Христовъ во оружiе Света облекшiйся;

Радуйся, яко отъ многiя скудости твоея разумелъ еси на нища и убога;

Радуйся, милостивый пастырь нашъ миловавшiй при жизни, и по преставленiи насъ не оставляющiй;

Радуйся, отче Iоанне треблаженне, всемiрный светильниче Церкви Христовой!

Кондакъ 7

Хотящу некоему человеку отъ многихъ врачевъ исцелитися отъ болезни, и егда ничтоже возможе получити во облегченiе от врачей, прибегша къ тебе, отче Iоанне врачу душъ и телесъ, ты исцелилъ того недуги душевныя и телесныя. Онъ же обрадованный прославилъ тя и благодарне возопилъ еси Богу: Аллилуiа.

I к о с ъ 7

Хотя погасити пламень пожарища будущiя имеборныя ереси злохульныя, юже провиделъ еси пророчески отче Iоанне Богопросвещенне за двадесять летъ, преподалъ еси святоотеческое ученiе во услышанiе вселенной, яко «Въ Имени Iисусъ Христосъ весь Христосъ, душа и тело Его соединенные съ Божествомъ».[10] Сiе святое твое Православiе лобызая, мы съ верою воспрiяли, яко непобедимое оружiе на сопротивныхъ имеборныхъ хулителей;[11] тебе же дивному и прозорливому чудотворцу восклицаемъ:

Радуйся, превелiй чудотворче, весь мiръ удививый твоими преслвными чудесы;

Радуйся, яко прибегающихъ къ тебе съ верою и мольбою не отпущаеши унылыхъ и неутешныхъ;

Радуйся, крепкiй споборниче за Божество Iисусъ Христова Имени противъ хулителей Его;[12]

Радуйся, избавленiе наше отъ искушенiй вражескихъ;

Радуйся, цвете нетленiя, процветшiй въ стране Россiйской, исполнивый ю благоухающими ароматы ученiй и подвигъ твоихъ;

Радуйся, отъ Кронштадта возсiявшiй добрый подвижниче Веры и благочестiя;

Радуйся, яко въ телесномъ чистомъ храме твоемъ славно Бога прославилъ еси;

Радуйся, ветвь благосеннолиственная въ греховной ночи от видимыхъ и невидимыхъ нашествiй вражiихъ дивно покрывающая насъ;

Радуйся, дерзновенный ходатай предъ Богомъ о прощенiи и помилованiи кающихся грешниковъ;

Радуйся, яко чистая душа твоя къ лику мудрыхъ Евангельскихъ девъ сопричтенная;

Радуйся, хранителю чистоты и целомудрiя;

Радуйся, яко со Ангелы и всеми святыми вечно Христа славословиши;

Радуйся, дивный въ браке девства блюстителю;

Радуйся, отче Iоанне треблаженне, всемiрный Светильниче Церкви Христовой!

Кондакъ 8

Странное и зело предивное житiе твое въ мiре семъ, егоже возненавидя, яко вне суетнаго мiра пожилъ еси и добродетельми къ Богу приблизился еси; сего ради, высокiй Богъ видя смиренное житiе твое и самоотверженное служенiе роду человеческому, возвеличилъ тя соделавъ обителiю Своею, Егоже благословенное Имя, прославляя,[13] ангельскую вопiемъ песнь: Аллилуiа.

I к о с ъ 8

Весь умъ твой въ вышнiй Iерусалимъ простерлъ еси, аще теломъ и пребывалъ на земли; всю красоту мiра сего ни во-что вменилъ еси, равноангельскому житiю поревновавъ, вторую купину показалъ еси словесный пастырю, егда молитвами сохранилъ еси посреде пламене крамолы и безбожiя невредиму Святую Церковь, въ нейже почиваше святыя мощи твоя не тако прославленныя отъ человекъ на земли, яко съ небесе отъ Бога прославленные обилiемъ благодатныхъ чудесъ, знаменующихъ непорочность и святость житiя твоего. Сего ради любовiю прославляемъ тя:

Радуйся, селенiе честное Святыя Троицы;

Радуйся, ковчеже позлащенный отъ потопа греховнаго призывающихъ тя, спасающiй;

Радуйся, любимиче нашъ, Бога о насъ умилостивляющiй;

Радуйся, мудрый хранителю чистоты Православныя веры во Имя Пресвятыя Троицы;

Радуйся, смрада хульной и злочестивой ереси имяборческой прогонителю;

Радуйся, Славы и Величiя Спасительнаго Имени «Iисусъ» дерзновенный проповедниче;[14]

Радуйся, Iоанне новый Россiйскiй Златоустъ, скверные богохульные уста еретиковъ дивно заграждающiй;

Радуйся, правыя веры, благочестiя, чистоты и целомудрiя наставниче;

Радуйся, яко чистоту въ супружестве явилъ еси;

Радуйся, яко монашескiй чинъ чистымъ въ мiре житiемъ твоимъ премного удививый;

Радуйся, мiрскихъ и монашествующих изрядный путеводителю въ горнее Отечество;

Радуйся, возбранителю супружества невоздержнаго предъ скорою кончиною мiра сего;[15]

Радуйся, необуреваемое и тихое пристанище обуреваемыхъ бурею страстей греховныхъ;

Радуйся, отче Iоанне треблаженне, всемiрный Светильниче Церкви Христовой!