Кондакъ 9

Все множество человеческое удивися равноангельному во плоти житiю твоему, многому терпенiю, смиренномудрiю и горячей любви ко Христу, непорочна и праведна тя созерцая, и ныне ходатайствующа о Богоизбранномъ стаде словесныхъ овецъ Христовыхъ, милостивый и мощный предстатель нашъ у престола Всесвятыя Троицы; сего ради наставляемiи тобою на путь покаянiя, благодаримъ Тя, Богу же вопiемъ: Аллилуiа.

I к о с ъ 9

Ветiя суемудренныя тщетно изощряхуся велеречуще, аки-бы ты не прославленъ еще Церковью на земли, дерзко возстающе на святость твою, и сего ради праведно быша уловлены въ пагубу имяборческiя ереси хулящей Имя Господне,[1] юже ты ревностно и поныне искореняеши всемiрной проповедью Божественной силы и Славы Спасительнаго Имени,[2] «еже паче всякаго имене»;[3] мы же спасаемые отъ еретическаго лжемудрiя твоимъ ученiемъ, дорогой нашъ Батюшка и добрый пастырю, созерцая множество чудесъ твоихъ, чтимъ тя верою и любовiю, яко прославленъ ты Господомъ Богомъ и въ земной жизни, и по преставленiи обилiемъ даровъ Святаго Духа; яко невозможно исчислити чудеса тобою совершаемыя! И съ помощью Божiей смиренныя приносимъ ти похвалы:

Радуйся, доброгласный славiй,[4] день бо и нощь славословилъ еси Пресвятое Имя Творца всяческихъ;

Радуйся, яко Всемогущимъ Именемъ Спасовымъ;[5] и смиреннымъ житiемъ победилъ еси козни дiавола;

Радуйся, страстей и недуговъ исцелителю;

Радуйся, учителю благочестiя и правоверiя;

Радуйся, низложителю еретическаго злочестiя;

Радуйся, избавителю чудный отъ потопа греховнаго;

Радуйся, скорая помощь наша въ трудныхъ обстоянiихъ;

Радуйся, скорый помощниче въ нахожденiи утеряннаго;

Радуйся, благопоспешниче путешествующимъ;

Радуйся, яко сущимъ близъ кончины здравiе даруеши;

Радуйся, свободителю отъ язвы смертоносныя;

Радуйся, будущая яко настоящая пророчески вещавый;

Радуйся, отче Iоанне треблаженне, всемiрный Светильниче Церкви Христовой!

Кондакъ 10

Спасенiе восхотевъ дати Господь людемъ Своимъ, пресiяющаго светильника мiру даровалъ еси, да светитъ седящимъ во тьме и сени смертней греховныя нощи, и да просветитъ тьму богозабвенiя. Мы же сподобившiяся таковаго благоволенiя и промышленiя о насъ милосерднаго Спасителя, даровавшаго намъ безмезднаго врача душъ и телесъ нашихъ отца Iоанна, благодарственную поемъ Богу песнь: Аллилуiа.

I к о с ъ 10

Стена еси и скорый заступниче, равносвятителю отче Iоанне, съ верою притекающихъ къ тебе; аще и не стоялъ еси на орлецехъ святительскихъ, но самымъ деломъ просветилъ еси вселенную Светомъ Православiя; ибо не званiемъ, но деломъ и положенiемъ, Господь поставилъ тя выше сана святительскаго, скорый помощниче и молитвенниче нашъ предъ Богомъ. Ты же, отче святый, якоже прежде скоро слышалъ еси моленiй гласы, тако и ныне вонми гласу хваленiй нашихъ тебе приносящихъ:

Радуйся, столпе непоколебимый Православiя;

Радуйся, зарница мiра светозарная;

Радуйся, сокровище неоскудеваемое многихъ исцеленiй;

Радуйся, скорый заступниче нашъ предъ Богомъ;

Радуйся, учителю смиренномудрiя и терпенiя;

Радуйся, яко въ сонiихъ являяся научаеши доброму житiю;

Радуйся, пресветлая звезда, благочестiемъ и правоверiемъ въ стране нашей Россiйстей чудесно возсiявшая;

Радуйся, чудодейственникъ Божiй, лучами чудесъ своихъ далечайшiя страны осiявшiй;

Радуйся, преискуснейшiй рыбарю, уловляющiй грешниковъ во мрежи покаянiя;

Радуйся, велiй ходатай нашъ предъ Богомъ, избавляющiй насъ чрезъ покаянiе отъ вечныхъ мукъ ада;

Радуйся, отче Iоанне треблаженне, всемiрный Светильниче Церкви Христовой!

Кондакъ 11

Пенiе умиленное приношу ти со слезами, всемощный заступниче нашъ, и вопiю недостойный: ходатайствуй за мя присно ко Пресвятей Троице, душею и теломъ недугующемъ, да избавитъ мя окаяннаго отъ тяжкаго ловительства лукавыхъ демоновъ въ плотскiя страсти, въ прелести и соблазны мiра сего, но да уловитъ душу мою грешную твоими, отче Iоанне молитвами, въ спасительныя мрежи покаянiя, и да подастъ ми отъ греховъ исцеленiе и души спасенiе, вопiющу песнь Богу: Аллилуiа.

I к о с ъ 11

Светопрiемную свещу неугасаемую зримъ тя, светильниче Церкви Христовой, отче Iоанне, не вещественной бо любви огнемъ возжегся еси, но яко благодатною отъ Бога зарею просвещаеши и наставляеши къ божественному деянiю вся, образомъ житiя твоего, облагодатствуя чувства наша. Темже и удостоенъ еси зело высшихъ почитанiй приносимыхъ нами:

Радуйся, луче пресветлый отъ Солнца-Христа Бога возсiявшiй;

Радуйся, светило благочестiя немерцающее;

Радуйся, яко светомъ премудрости Божiей обильно обогатился еси, и мою душу просвети грешную;

Радуйся, яко вечныхъ лучей света божественнаго чрезъ тебе и мы сподобляемся;

Радуйся, безмездный врачу душъ и телесъ нашихъ;

Радуйся, живоносный источниче неистощимый, присно источающiй обильные струи исцеленiй;

Радуйся, благонадежный о насъ молитвенниче и предстатель предъ престоломъ Всевышняго;

Радуйся, спасительное пристанище притекающихъ къ тебе отъ бурнаго житейскаго плаванiя;

Радуйся, велiй заступниче сущимъ въ лютыхъ обстоянiихъ;

Радуйся, мvро благоуханное многаго твоего проповеданiя;

Радуйся, елеемъ радованiя исцеляющiй скорби душевныя многихъ верою молящихся ти;

Радуйся, отче Iоанне треблаженне, всемiрный Светильниче Церкви Христовой!

Кондакъ 12

Благодать обильно излiя Господь на тебе отче Iоанне, недужныя исцеляти, болезни врачевати, демоны прогоняти, страсти искореняти; яко частымъ бо прiобщенiемъ Святыхъ Тайнъ соединился еси со Христомъ Iисусомъ; мы же Богу благодарни о велiей на тебе Благодати, умоляемъ тя, новаго златословеснаго Iоанна: не забуди насъ почитающихъ святость твою, и во время лютыхъ испытанiй, въ тяжкихъ напастяхъ, молитвенно изведи ны от оныхъ, да поемъ Богу в умиленiи благодарственную песнь: Аллилуiа.

I к о с ъ 12

Поюще твоя чудеса святый Iоанне Богохвальный, съ верою, надеждою и любовiю притекаемъ къ твоей помощи, дорогой нашъ Батюшка, принеси хвалебное пенiе наше ко Владыце и Богу, да сподобитъ насъ, исповедающихъ Божество Имени Господня деснаго стоянiя на Страшном Суде Его, тебе же воспевающихъ сице:

Радуйся, великiй Христовъ угодниче;

Радуйся, неисчерпаемое море благодатныхъ чудесъ;

Радуйся, молитвенниче усердный о почитающихъ тя;

Радуйся, преисполненный Благодати Святаго Духа Божiй избранниче

Радуйся, присно веселящiйся о Господе Бозе Вседержителе;

Радуйся, яко трудовъ твоихъ мзду, воспрiялъ еси обильную на небесехъ;

Радуйся, предвозвестителю скораго Втораго Пришествiя и Суда Христова;

Радуйся, скорый предстатель и ходатай нашъ предъ Богомъ;

Радуйся, благое иго Христово и бремя Его легкое на земли благопокорно понесшiй;

Радуйся, яко за земные труды и великiе подвиги твои, вечное упокоенiе обрелъ еси на небеси;

Радуйся, яко временныхъ и вечныхъ благъ от Господа Бога присно просиши намъ;

Радуйся, яко кадило благовонное был еси благоухавшее чтущихъ тя;

Радуйся, отче Iоанне треблаженне, всемiрный Светильниче Церкви Христовой!

Кондакъ 13

О, великiй всемiрный Светильниче Церкви Христовой, пророче и чудотворче предивный! О, добрый пастырь нашъ, заступниче и пламенный о мiре молитвенникъ! О, святый угодниче Христовъ Iоанне Богоносне! Ты проповедовалъ о близости кончины мiра и темъ спасъ отъ пагубы всемiрнаго отступленiя[6] отъ искупившаго мiръ Владыки – остатокъ Веры Православной, молимъ тя: вонми умиленной сердечной молитве нашей, и спаси насъ грешныхъ отъ лютой годины искушенiя[7] и отъ тайныхъ сетей вражiихъ; испроси намъ у Бога мирной христiанской кончины въ покаянiи; да и во исходе нашемъ из жизни сей воспоемъ Богокрасную песнь: Аллилуiа.

(Сей Кондакъ глаголется трижды. Затемъ, Iкосъ 1, и Кондакъ 1.

Молитва

Дорогой нашъ Батюшка отче Iоанне Кронштадтскiй! Прiими благоутробно сiе малое, по силе нашей приносимое тебе хвалебное пенiе и молитву нашу: вемы, яко ты милостивый о насъ грешныхъ заступникъ и молитвенникъ предъ Господомъ: вознеси о насъ недостойныхъ обычные твои пламенные молитвы къ Богу во Святей Троице, да пробавитъ милость Свою намъ грешнымъ, да избавитъ насъ, Милосердный Спаситель Iисусъ Христосъ, отъ всякiя скорби и болезни непомерныя, отъ прелестей и соблазновъ мiра сего, отъ помраченiя, неведенiя и смерти духовной, отъ наглой внезапной смерти и отъ будущаго вечнаго мученiя уготованнаго нераскаяннымъ грешникамъ. О, милостивый отче Iоанне! Испроси намъ у Господа и у Царицы спасенiя нашего, Всепетой Приснодевы Марiи Богородицы, прощенiе многихъ нашихъ согрешенiй, хотя при исходе нашемъ изъ земной жизни. Къ тебе прибегаемъ и молимъ тя усердно, дорогой, любвеобильный нашъ Батюшка, скорбями и грехами обременены есмы, не отрини насъ отъ твоего заступленiя, вонми гласу отчаянныхъ, немоществующихъ, разсеянныхъ и блуждающихъ по распутiям въ нощи греховней словесныхъ овецъ Божiего стада, и твоихъ чад, измученныхъ жизнью суровой въ богоотступномъ мiре семъ; возстави ны падшихъ во многiя грехи и беззаконiя, яко смесишася во языцехъ и навыкоша деломъ ихъ;[8] укрепи насъ до кончины нашея пребывати въ благочестiи и чистоте, въ истинной Православной вере, въ исповеданiи Божества и Спасительности Имени Божiя; испроси намъ у Господа обновленiя душъ нашихъ покаянiемъ, яко вторымъ крещенiемъ, и прiими всехъ правоверныхъ христiанъ въ твое вечное наследiе, славити и воспевати благословенное и препрославленное вседержавное Имя Пресвятыя Троицы: Отца, и Сына, и Святаго Духа во веки вековъ. Аминь.

Молитва иная.

Добрый пастырь нашъ, отче Iоанне Кронштадтскiй, такъ нежно и горячо любившiй свой народъ! Помолись тамъ, на небе, за горячо любящихъ и преданныхъ тебе истинно-православныхъ христiанъ; помяни насъ грешныхъ въ святыхъ молитвахъ твоихъ предъ престоломъ Божiимъ, и не оставляй никогда насъ своею христiанскою любовiю, какъ не оставлялъ насъ здесь, на земле; помоги намъ сохранить Святое Православiе, избежать козней антихриста, да твоимъ ходатайствомъ предъ Богомъ сподобимся здесь на земле и на небе святить достопоклоняемое Имя Его во веки вековъ. Аминь.

Величанiе

Величаемъ тя, / преподобне отче Iоанне Богоносне, / и чтемъ святую память твою, / наставниче всехъ ко спасенiю, / и собеседниче Ангеловъ.

Тропарь, гласъ 4:

Дивный пастырь показался еси, / богоблаженне Iоанне Кронштадтскiй, / подобный великимъ святителямъ въ лике святыхъ просiявшимъ, / чрезъ нихъ же благодать Христа Бога воспрiялъ еси: / недуги душевныя и телесныя исцеляти, / малодушныя утешати, / ленивыя на покаянiе воздвизати, / заблудшихъ к Православiю наставляти,/ благочестивыя въ Таинстве причащенiя со Христомъ соединяти. / Сего ради любовiю ублажаемъ тя, / молящагося о душахъ нашихъ.

инъ Тропарь, гласъ 8:

Праведникъ Божiй и всемiрный чудотворче / молитвенникъ, предивный и целитель пресладостный, / притекавшихъ къ тебе недужныхъ множества, / молитвою ты ихъ исцелялъ еси. / Даруй и мне скорое исцеленiе / душевное же и телесное: / падшему во многiя и тяжкiя грехи, / испроси у Бога согрешенiй моихъ прощенiе, / любимый нашъ отче Iоанне, / и молися ко Господу спастися душамъ нашимъ.

инъ Тропарь, гласъ 4:

Во Христе во веки живый чудотворче, / любовiю милуяй сущихъ въ бедахъ: / слыши чада твоя верою тя призывающихъ, / щедрыя помощи от тебе чающихъ, / Iоанне Кронштадтскiй возлюбленный пастырю наш.

Кондакъ, гласъ 4:

Праведникъ Божiй и великiй чудотворче, / столпъ и утвержденiе Церкви Христовой, / путеводная звезда истиннаго Православiя, / изводящая отъ ереси и къ Божественней истине приводящая, / дорогой нашъ батюшка Iоанне Кронштадтскiй, / моли о насъ милосердiе Божiе, / на путь покаянiя наставити, / очистить насъ от страстей греховныхъ,/ греховъ разрешенiе даровати намъ, / память смертную имети, / и молитву Iисусову непрестанную, / исповедникамъ славы и Божества Имени Божiя, / съ верою и любовiю тя почитающимъ.

инъ Кондакъ, гласъ 4:

Отъ младенства Богомъ возлюбленный, / и во отрочестве даръ ученiя отъ Него чудесно прiявый, / ко пресвитерству въ сонномъ виденiи призванный, / и пастырь Христовы Церкви великiй бывый,/ отче Iоанне благодати тезоимените,/ Моли Христа Бога, / всемъ намъ съ тобою въ Царствiи Божiемъ быти.

инъ Кондак, гласъ 8:

Избранный угодниче и преславный чудотворче, / добрый пастырь и пламенный о мiре молитвенниче, / хвалебное отъ любве нашея возсылаемъ ти пенiе; / ты же яко имеяй молитвенное дерзновенiе ко Господу; / отъ всякихъ насъ бедъ свободи умильно поющихъ: / Радуйся отче Iоанне треблаженне, / всемiрный светильниче Церкви Христовой.

Песнопения въ конце службы:

Утвержденiе на Тя надеющихся, | утверди Господи Церковь, | юже стяжалъ еси | честною Твоею кровiю (Трижды).

Утверди Боже, | святую православную веру, православныхъ христiанъ, | во векъ века.

Всю братiю нашу и вся православныя христiаны, | Господи помилуй, Господи помилуй, Господи помилуй, | Господи сохрани их на многая лета.

Упованiе мое Отецъ, | прибежище мое Сынъ, | покров мой Духъ Святый: | Троице Святая, слава Тебе.

Богородице Дево, | упованiе христiаномъ, | покрый, соблюди, и спаси на Тя уповающихъ.

Не имамы иныя помощи, | не имамы иныя надежды, | разве Тебе Владычице, | Ты намъ помози, | на Тебе надеемся, | и Тобою хвалимся, | Твои бо есмы раби, | да не постыдимся.

Все упованiе мое на Тя возлагаю, / Мати Божiя, | сохрани мя подъ кровомъ Твоимъ.

Владыко Христе Царю Многомилостиве, | прiими молитвы рабъ Твоихъ, | и избави насъ, отъ всякiя нужды и печали.

Владычице, прiими молитвы рабъ Твоихъ, | и избави насъ, | отъ всякiя скорби и болезни.

Господи помилуй, | Господи помилуй, | Господи помилуй. Аминь.

Господи мой Господи, | Пастырь мой родной, | спаси меня отъ ада, | и будь всегда со мной.

Слава Ему во веки!

Аминь.

Служба и Акафистъ Святымъ Мученикамъ исповедникамъ Афонскимъ, за Имя Господне пострадавшимъ въ 1913 г.

(Память совершается 3 Iюля (по ст/ст) въ день избiенiя и мученической

ихъ кончины)

(Исторiя Афонского погрома въ конце сего Акафистника)

Выпуск 2

+

На велицей вечерни

(Если без священника, благословляетъ старшiй: Молитвами святыхъ отецъ нашихъ, Господи Iисусе Христе Боже нашъ, помилуй нас» и поютъ: Аминь.

(Если нетъ старшего, тогда поютъ, или чтецъ произноситъ: Молитвами святыхъ отецъ нашихъ, Господи Iисусе Христе Боже нашъ, помилуй насъ, аминь).

Затемъ, поютъ:

1.Прiидите поклонимся Цареви нашему Богу.

2.Прiидите поклонимся и припадемъ Христу Цареви нашему Богу.

3.Прiидите поклонимся и припадемъ Самому Христу Цареви и Богу нашему.

4.Прiидите поклонимся и припадемъ Ему.

Посемъ: Благослови душе моя Господа: (псаломъ 103)

Ектенiя великая: (Господи помилуй 12 раз, и: Аминь)

Блаженъ мужъ: первый антифонъ.

Ектенiя малая: (Господи помилуй трижды)

Господи воззвахъ къ Тебе, услыши мя:

Стихи: Положи Господи, храненiе устомъ моимъ:

После Аще беззаконiя назриши Господи… на каждый стихъ поемъ стихиру.

Стихиры на 6, повторяюще 1-ю. Гласъ 6:

Блаженна земля напившаяся кровьми вашими, / мученицы Афонстiи, / за Имя Господне пострадавшiи / отъ Россiйскаго Синода и лжеименнаго Никона / архiимяборца бунтаря Афонскаго[9]; / мы же достойную память вашу совершающе молимся: / молите Христа Бога нашего / о спасенiи почитающихъ Васъ, святiи мученицы.

Зрителiе Славы Имени Божiя / всеблаженнiи мученицы, / юже не измениша на блага мiра сего, / за нюже и кровь свою, ничтоже сумняшеся, пролiяша, / яко велико и всемогуще Имя Сына Божiя, / держитъ бо мiръ весь, / рече ученикъ Павловъ, / Эрма Апостолъ святый.[10]

Несть наша брань къ плоти и крове, / но къ началомъ и властемъ / и миродержителемъ тьмы века сего,[11] / глаголетъ Божественный Павел; / памятуя глаголы сiя божественныя, / страдальцы Афонстiи, / низложили силы вражiи, / и души своя предали / за честь и славу Имени Божiя.

Яко «на колесницехъ и на конехъ» во всеоружiи, демоновъ, / лютые имяборцы ополчишася / на исповедниковъ Божества Имени Божiя; / «мы же во Имя Господа Бога нашего призовемъ»:[12] / сецыте тела и пiйте нашу кровь, / отъ Божества же Имени Божiя не отречемся, / яко Самъ Господь пребываетъ во Имени Своемъ, / глаголаше исповедницы. / Молитеся о насъ ко Господу святiи мученицы, / да сподобитъ Iисусъ Сынъ Божiй, / и насъ, до кончины нашея, постояти за Пресвятое Имя Его.

Буди, Господи, милость Твоя на насъ, / якоже на Святое Имя Твое уповахомъ:[13]/ очисти, и избави нас отъ беззаконiй нашихъ, / молитвами Пресвятыя Пречистыя Богоматере, / святыхъ мучениковъ исповедниковъ Афонскихъ, / пострадавшихъ за Имя Твое Пресвятое, / да избегнемъ сетей вражiихъ мiра сего, / сохрани насъ отъ мерзкiя печати антихриста, / и да спасемся Именемъ Твоимъ Святымъ.[14]

Слава: гласъ 6:

О Мати, Пресвятая Богородице Дево, / Царица спасенiя нашего, / Игуменiя Святыя Горы Афонскiя, / Споборнице Афонских исповедников / въ брани за Имя возлюбленнаго Сына Твоего, / Христа Бога нашего! / споборай и намъ грешнымъ въ мiре сем, / до конца жизни нашея постояти за Имя Господне, / и Твоими, Владычице, всесильными молитвами / спастися душамъ нашимъ.