И ныне: Богородиченъ, гласъ 6:

Кто Тебе не ублажитъ, Пресвятая Дево; / кто ли не воспоетъ Твоего пречистаго Рождества; / безлетно бо отъ Отца возсiявый Сынъ Твой Единородный, / Тойже отъ Тебе Чистыя пройде, / неизреченно воплощся, / естествомъ Богъ сый: / и естествомъ бывъ человекъ насъ ради, / не во двою лицу разделяемый: / но во двою естеству неслитно познаваемый. / Того моли Чистая, Всеблаженная, / помиловатися душамъ нкшимъ.

Свете тихiй. Прокименъ дне.

1. В Воскресенье вечера, Гласъ 8: Се ныне благословите Господа вси раби Господни. Стихъ: Стоящiи во храме Господни, во дворехъ дому Бога нашего.

2. В понедельникъ вечера, Гласъ 4: Господь услышит мя, внегда воззвати ми къ Нему. Стихъ: Внегда воззвати ми, услыша мя Богъ правды моея.

3. Во вторникъ вечера, Гласъ 1: Милость Твоя, Господи, поженетъ мя, вся дни живота моего. Стихъ: Господь пасетъ мя, и ничтоже мя лишитъ: на месте злачне, тамо всели мя.

4. В среду вечера, Гласъ 5: Боже, во Имя Твое, спаси мя, и въ силе Твоей суди ми. Стихъ: Боже, услыши молитву мою, внуши глаголы устъ моихъ. (Псал. 53,3-4).

5. В четвергъ вечера, Гласъ 6: Помощь моя отъ Господа, сотворшаго небо и землю. Стихъ: Возведохъ очи мои въ горы, отнюдуже прiидетъ помощь моя.

6. В пятницу вечера, Гласъ 7: Боже, заступникъ мой еси Ты, и милость Твоя предваритъ мя. Стихъ: Изми мя отъ врагъ моихъ Боже, и отъ востающихъ на мя избави мя.

7. В субботу вечера, Глас 6: Господь воцарися, въ лепоту облечеся. Стихъ: Облечеся Господь въ силу и препоясася.

Стихъ: Ибо утверди вселенную, яже не подвижится.

Стихъ: Дому Твоему подобаетъ святыня, Господи, въ долготу днiй.

И чтенiя исповедническiя пять.

Чтецъ: Исхода чтенiе.

И рече Моисей къ Богу: се азъ пойду къ сынамъ Израилевымъ и реку къ нимъ: «Богъ отецъ нашихъ посла мя къ вамъ: и аще вопросятъ мя, что Имя Ему? Что реку къ нимъ? – И рече: тако речеши сыномъ Израилевымъ: Сый посла мя къ вамъ. И рече Богъ паки къ Моисею: тако речеши сыномъ Израилевымъ: Господь Богъ отецъ нашихъ, Богъ Авраамовъ, и Богъ Исааковъ, и Богъ Iаковль посла мя къ вамъ: сiе Мое есть Имя Вечное.[7] Глагола же Богъ къ Моисею и рече ему: «Азъ Господь: и явихся Аврааму, и Исааку, и Iакову, Богъ сый ихъ: Имене Моего Господь, не явихъ имъ.[8] И рече Господь: «Не возьмеши Имене Господа Бога твоего всуе: не очиститъ бо Господь, прiемлющаго Имя Его всуе».[9] Не бо поклонитеся богомъ инымъ: ибо Господь Богъ ревниво Имя, Богъ ревнитель есть.[10] Да покажу на тебе крепость Мою, и яко да проповестся Имя Мое по всей земли.[11]

Втораго закона чтенiе.

Тако глаголетъ Господь: Господа Бога твоего боишися, и Тому Единому послужиши, и къ Нему прилепишися, и Именемъ Его кленешися.[12] Десятины да даси и да снеси я предъ Господомъ Богомъ твоимъ на месте, идеже изберетъ Господь Богъ твой призывати Имя Его тамо. Да принесеши десятину пшеницы твоея… да научишися боятися Господа Бога твоего вся дни: аще же далече будетъ путь отъ тебе, и не возможеши донести ихъ, яко далече место отъ тебе, еже изберетъ Господь Богъ твой, и продаси сiе на цене.[13] «Не возможеши жрети пасху… но токмо на месте, еже изберетъ Господь Богъ твой призывати Имя Его ту.[14] Того (колено Аарона) избра Господь Богъ твой отъ всехъ племенъ твоихъ, предстояти предъ Господомъ Богомъ твоимъ, служити и благословити во Имя Господне, той и сынове его во вся дни… Да служитъ Имени Господа Бога вашего.[15] Пророка возставлю имъ отъ среды братiй ихъ, якоже тебе: и вдамъ Слово Мое во уста его и возглаголетъ имъ, якоже заповедаю ему; и человекъ той, иже не послушаетъ словесъ его, елика возглаголетъ пророкъ оный во Имя Мое, Азъ отмщу отъ него.[16] Аще не послушаете творити вся словеса закона сего, написанныя въ книге сей, еже боятися Имене честнаго и чуднаго сего, Господа Бога твоего. И удивитъ Господь язвы твоя… дондеже потребитъ Тя.[17]

Книги первыя Паралипоменона чтенiе.

Во время оно и весь Израиль взыде во градъ Давидовъ… еже вознести тамо Кивотъ Господа Бога, седяща на херувимехъ, идеже призвано есть Имя Его.[18] Въ той день устрои Давидъ въ начале хвалити Господа рукою Асафа и братiи его: исповедайтеся Господеви, и призывайте Его во Имени Его. Знаемы сотворити людемъ начинанiя Его. Пойте Ему и воспойте Ему: поведите вся чудеса Его, яже сотвори Господь. Хвалите Имя Святое Его.[19] Рече же Давидъ Соломону: чадо мне бяше въ сердце, да созижду домъ Имени Господа моего. И бысть слово Господне ко мне, глаголющее: многи крови пролiялъ еси, и многи брани сотворилъ еси, не созиждеши домъ Имени Моему… Се сынъ родится тебе… той созиждетъ домъ Имени Моему.[20] Возстаните и созидайте Святыню Господу Богу вашему, да внесется Кивотъ Завета Господня, и сосуды святыя Богови въ домъ, созидаемый Имени Господню.[21] И благослови царь Давидъ Господа предъ всемъ множествомъ, глаголя: Благословенъ еси Господи, Боже Израилевъ, Отецъ нашъ отъ века и до века… И ныне, Господи, исповедаемся Тебе и хвалимъ Имя хваленiя Твоего.[22] Господи Боже нашъ, да созиждется домъ Имени Святому Твоему.[23]

Пророчества Исаiина чтенiе.

Тако глаголетъ пророкъ: Се Богъ мой, Спасъ мой… воспойте Имя Его, возвестите во языцехъ славная Его: поминайте, яко вознесеся Имя Его. Хвалите Имя Господне.[24] Господи, Боже нашъ, прославлю Тя, воспою Имя Твое, яко сотворилъ еси чудная дела.[25] Уповахомъ на Имя Твое… Господи Боже нашъ, стяжи ны: Господи, разве Тебе иного не вемы: Имя Твое именуемъ.[26] Се Имя Господне идетъ временемъ многимъ, горящая ярость Его: со славою слово устенъ Его, слово гнева полно.[27] Яко Имя Господне велико вамъ есть.[28] Азъ Господь Богъ, сiе Мое есть Имя, славы Моея иному не дамъ.[29] Васъ ради присно Имя Мое хулится во языцехъ. Сего ради познаютъ людiе мои Имя Мое въ той день, яко Азъ есмь Самъ глаголяй, ту есмь.[30] Господь Саваофъ Имя Ему; избавивый тя, Святый Богъ Израилевъ.[31] И явлено будетъ Имя Твое въ сопротивныхъ Твоихъ.[32] Напоминайте, яко велико Имя Его.[33] Услышите Глаголъ Господень трепещущiи словесъ Его: рцыте, братiе, ненавидящимъ вамъ и гнушающимся, да Имя Господне прославится, и явится въ веселiи ихъ, и они посрамятся.[34]

Пророчества Малахiина чтенiе.

Тако глаголетъ Господь: Вы священницы, презирающiе Имя Мое… Несть воля Моя въ васъ, глаголетъ Господь Вседержитель, и жертвы не прiиму отъ рукъ вашихъ. Зане отъ востокъ солнца, и до запада Имя Мое прославися во языцехъ, и на всякомъ месте фимiамъ приносится Имени Моему, и жертва чиста, зане велiе Имя Мое во языцехъ. Зане Царь велiй Азъ есмь… И Имя Мое светло во языцехъ.[35] И ныне заповедь Моя сiя къ вамъ, священницы: аще не услышите, и аще не положите на сердцахъ вашихъ, еже дати славу Имени Моему, глаголетъ Господь Вседержитель, то послю на вы клятву, и прокляну благословенiе ваше, и оклену е: и разорю благословенiе ваше, и не будетъ въ васъ, зане вы не влагаете въ сердца ваша.[36] Заветъ Мой бе съ нимъ (Моисеемъ) жизни и мира, и дахъ ему боятися Мене, и отъ лица Имене Моего устрашатися ему… Вы же растлисте заветъ Левiинъ.[37] И написа книгу памяти предъ собою боящимся Господа и благоговеющимъ Имя Его.[38] И возсiяетъ вамъ, боящимся Имене Моего, Солнце правды и исцеленiе въ лучахъ его.[39]

Ектенiя: Рцемъ вси: (Если нет священника: Господи помилуй 12, и: Аминь). Сподоби, Господи в вечер сей:

Ектенiя просительная: (Подай Господи, 12, и: Аминь).

На литiи стихиры, гласъ 8:

Господи, Имя Твое во векъ, / и память Твоя в родъ и родъ![40] / Тако Пресвятое Имя Твое воспеваетъ Церковь и Давидъ псалмопевецъ; / Имяславiе церковное исповедуя, / Афонстiи отцы исповедницы ополчишася / въ брань за Имя Господне, / егда ересь Денницина / въ Горе Афонстей возгореся, / уши свои затыкаша исповедницы, / не слышати хулы имяборческiя, / и съ Михаиломъ Архангеломъ возопиша кто, яко Богъ:? / Кто воздвиже рогъ свой на Имя Господа Бога? / хула на главы ваша да снидетъ! / Мы же славимъ величающе / благословенное Имя Господне: / Отца, и Сына, и Духа Святаго![41]

Союзъ исповедниковъ Имени Божiя, / в честь святаго Михаила Архангела / схiигуменъ Арсенiй создал еси на Афонстей горе, / знаменитейшiй миссiонеръ Россiйскiй, / во-еже победити имяборчество, / заграждати уста еретическiя; / дважды Михаилъ Архангелъ чудо сотвори: / егда убiйца Каин шед убити отца нашего Арсенiя, / аки бы записатися въ ополченiе имяславческое, / на пути дважды былъ избiенъ / Михаиломъ Архангеломъ во образе инока.

Вам священницы, дарова Господь / святую заповедь свою: / аще сердца своего не приложите, / еже воздати славу Имени Моему, / прокляну васъ и ваши благословенiя, / и уже проклинаю, / яко сердца ваша не прилагаете к тому; / вамъ имяборцы глаголетъ Господь Саваофъ, / они же затыкаша уши своя, / нехотяще слышати повеленiя Господа Бога, / и безумно восхулиша Святое Имя Его.[42]

Слава: гласъ 2:

Церковь Небесная Торжествующая, / и Церковь земная воинствующая, / дивное Имя Твое Iисусе Спасе нашъ, / вкупе воспеваютъ торжествующе,[43] / Ему же поклоняются Ангели и человецы;[44]/ глаголетъ Петръ святый апостолъ: / несть инаго имене под небесем кроме Имене Iисусова, / имже подобаетъ спастися намъ.[45] / На конецъ же вековъ явися имяборческое отступленiе, / еже Павелъ апостолъ возвестилъ.[46] / Яко же Самъ Господь рече являя Божество Имени Своего,/ «Азъ Господь Богъ, Сiе Мое Имя Вечное».[47] / Избави ны, Господи, отступленiя отъ веры въ Пресвятое Имя Твое, / и пребуди съ нами, яко же обещался еси, до скончанiя века, Христе.[48] / молитвами Афонскихъ святыхъ мучениковъ.

И ныне: гласъ 1:

Владычице наша Пресвятая Богородице, / Ревнительнице Славы Имени Сына Своего, / егда вошла еси въ домъ Захарiинъ, / и целова Елисаветъ, / и бысть яко услыша Елисаветъ целованiе Твое, / взыграся младенец во чреве ея: / и исполнися Духа Святаго Елисаветъ: / и возопи гласомъ велiим и рече: / благословенна Ты въ женахъ и благословенъ плодъ чрева Твоего. / И откуду мне сiе, яко прiиде Мати Господа моего ко мне! / Ты же Всечистая, рекла еси: / Величитъ душа Моя Господа / и возрадовася духъ Мой о Бозе Спасе Моемъ… / Яко сотвори Мне величiе Сильный; / И СВЯТО ИМЯ ЕГО; / и милость Его въ роды родовъ боящимся Его![49] / Сего ради Споборницею имяславческому ополченiю была еси / за Божество Имени возлюбленнаго Сына Твоего, / многажды являя на Афоне знаменiя и чудеса / во дни брани съ засилiемъ имяборческимъ, / укрепляя и утешая имяславцев многими чудесы, / въ оправданiе Имяславiя.[50] / И насъ грешныхъ укрепляй Владычице, / въ стоянiи за Божество Имени Iисуса Сына Твоего, / и Бога нашего.

На стиховне стихиры, гласъ 7:

Всемогущею силою Пресвятаго Имени Господа,[51] / одержаша победу иноцы во Святей Афонстей горе, / егда Никонъ повеле подписати хульную грамоту Синода, / исповедницы же повеленiе безбожное отвергоша, / нечестiе имяборческое ревностно обличиша, / яко хулу апокалипсическаго зверя, / открывшаго уста своя на Бога еже хулити Имя Его;[52]/ возбесишася же Никонъ вашимъ исповедничествомъ, / возгореся противу Славы Имени Божiя, / повеле воинамъ бити васъ штыками и прикладами. / Честь и слава вашему мужеству и похвала: / и быша убiени иноцы, / прiявшiе отъ Господа венцы мучениковъ,[53] / молящiеся о спасенiи душъ нашихъ.

Хвалите Имя Господне, / хвалите раби Господа.[54]

Венцы мучениковъ воспрiяша отъ Бога / славнiи исповедницы Афонстiи, / исполнися на васъ обетованiе Господне: / для васъ благоговеющiе предъ Именемъ Моимъ, / взойдет солнце правды и исцеленiе въ лучахъ его, / и яко тельцы упитаннiи взыграете, / и будите попирать нечестивыхъ, / глаголетъ Господь Саваофъ.[55] / Милостивiи будите къ намъ святiи мученицы, / не забудите насъ братьев вашихъ, / съ любовiю святую вашу память почитающихъ, / и молите Господа спастися душамъ нашимъ.

От востокъ солнца до западъ, / хвально Имя Господне.[56]

Радость предрече Господь Саваофъ: / боящихся Бога Слышитъ Господь, / и предъ Нимъ пишется памятная книга / о боящихся Бога и чтущихъ Имя Его.[57] / Слава Ти Господи Боже нашъ / за Твою великую милость / исповедникамъ Пресвятаго Имени Твоего! / Сподоби и насъ, Милостивый Господи, / боятися Святаго и Страшнаго Имени Твоего,[58] / да будемъ и мы, грешнiи, / вписани въ Книзе живота вечнаго.[59]

Слава и ныне. Богородиченъ, гласъ 8

Владычице, прiими молитвы рабъ Твоихъ / исповедниковъ Божества Имени / Сладчайшаго Iисуса, Сына Твоего и Бога нашего,[60]/ и избави насъ отъ всякiя нужды и печали.

Ныне отпущаеши: Трисвятое по Отче нашъ:

Тропарь, гласъ 6:

Онебесившiи житiе ваше Афонстiи мученицы, / славнымъ подвигомъ вашимъ исповедническимъ, / егда веленiе архiимяборца Никона попрали есте / подписати грамоту синодальную, / Божество Имени Божiя отвергшую, / Имя же Iисусово Сладчайшее, / аки простое имя человеческое нарекшую. / Вы же славнiи Божiи исповедницы, / Имя Господне защитившiи, / и души за Него своя предавшiи, / и венцы отъ Господа прiявшiи: / дерзновенно молитеся о нас ко Господу, / сохранити веру во Имя Господне.[61]

Слава и ныне: инъ Тропарь, гласъ 1:

Болезньми Святыхъ Афонскихъ мучениковъ, / за Имя Твое пострадавшихъ, / умоленъ буди Милостивый Господи, / и вся наша болезни исцели, / Человеколюбче, молимся.

Богородице Дево, Радуйся:

Буди Имя Господне благословенно от ныне и до века (трижды).

Слава: и ныне:

Псаломъ 33: Благословлю Господа до: не лишатся всякаго блага.

На утрени,

По шестопсалмiи, Ектенiя великая. (или: Господи помилуй 12, и: Аминь)

На Богъ Господь:

Тропарь 1-й мученикамъ, гласъ 6.

Онебесившiи житiе ваше: (зри выше)

Слава: инъ Тропарь, гласъ 1:

Болезньми святыхъ Афонскихъ мучениковъ: (зри выше).

И ныне: Богородиченъ, гласъ 4:

Владычице наша Всеблагая, / призри на моленiя рабъ Твоихъ, Всенепорочная, / ревнующихъ о славе Пресвятаго Имени / возлюбленнаго Сына Твоего и Бога нашего, / и буди намъ, Всесильная, Помощнице / въ брани съ полчищами имяборческихъ супостатъ, / хуленiемъ Имени Божiя / оскверняющихъ слухъ правоверныхъ, / и Милостивая буди намъ Заступнице / в Страшный День Судный.

Таже стихословимъ кафизмы.(По уставу)

Поется: Господи помилуй, Господи помилуй, Господи помилуй, слава Отцу и Сыну и Святому Духу.

Чтецъ: И ныне… И чтетъ кафизму. (По Уставу)

По 1-й кафизме: Слава и ныне: аллилуiа, аллилуiа, аллилуiа слава Тебе Боже, (трижды) Господи помилуй, (трижды) слава отцу и Сыну и Святому Духу. И:

Седаленъ, гласъ 2:

Именемъ Iисусовымъ, яко всесильнымъ оружiемъ / укрепишася, иноцы Афонстiи / победиша полки демонскiя[62] / воставшiя на Божество Имени Божiя, / нетерпя опаляемой силы Его, / обломаша зубы скрежещущiи на Имя Господне / и на исповедниковъ Его Божества.[63]

И ныне: Богородиченъ, гласъ 4:

Честнейшая, Мати и Дево Всенепорочная, / Херувимъ и славнейшая безъ сравненiя Серафимъ, / къ Тебе прибегаемъ и Тебе молимся недостойнiи раби Твои: / очисти сердца наша и умъ, / отгони мрачные скаредные помыслы демонскiя, / да чистымъ умомъ и сердцемъ сокрушеннымъ и смиреннымъ / славимъ благодатное Имя Твое.

Затем, поется: Господи помилуй, Господи помилуй, Господи помилуй, слава Отцу и Сыну и Святому Духу. Чтецъ: И ныне…И 2-ю кафизму.

По 2-й кафизме, чтецъ: Слава и ныне: Аллилуiа (трижды), Господи помилуй 3 (трижды), Слава…

и Седаленъ, гласъ 8:

Хвалимъ, величаемъ и благословляемъ / Всепетое Имя Твое Iисусе Спасе нашъ, / поклоняемся и усердно лобызаемъ, / и съ любовiю вопiемъ Ти: / Iисусе, Спасительное Имя, помилуй нас.[64]

И ныне: Богородиченъ, гласъ 1:

О Пресвятая Дево Богородице, / Преблагословенная Мати Господа! / Вонми гласу моленiя насъ грешныхъ, / недостойныхъ рабъ Твоих: / взыщи души наша во грехахъ погибающiя, / но отъ любве къ Тебе вопiющихъ:/ укрепи насъ на спасительномъ пути: / величати и славити Имя Господне, / и Твое благодатное Имя.