Стихиры на 6, гласъ 2:

Кiими усты ублажимъ светильника церковнаго, / возсiявшаго близъ кончины вековъ, / великаго исповедника Иларiона Кавказскаго, / яко звезда людемъ явившаяся пресветлая, / пребывающимъ въ неведенiи «Тайны Благочестiя» / во исповеданiи Имени Пресвятыя Троицы,[1]/ и «тайны беззаконiя» / въ похуленiи Имени Божiя; / намъ же, сущимъ во истинномъ исповеданiи / духовнымъ чадомъ его, / радость неизреченную.

Кiими словесы ублажимъ пустынника пречуднаго, / Славы Имени Божiя проповедника, / даръ молитвы совершенной отъ Бога прiявшаго, / гневъ Божiй на Россiю и скорую мiра кончину предрекшаго / похуленiя ради Имени Владыки и Господа, / преславнаго чудотворца и пламеннаго молитвенника, / и печальника о всемъ мiре, Богомъ даннаго.

Ревностiю, любимиче Христов, возгорелся еси / о Славе Имени Божiя, / скорбя униженiя ради Его имяборцами, / выразил еси обиду Самому Господу, / безчестiе Имени Своего попустившему,/ печалiю томился еси: / не достоитъ бо творити сiя беззаконiя. / Сострадая, отче Иларiоне, скорби твоей, / умиленно молимъ тя: / настави заблудшихъ имяборцевъ на покаянiе, / не ведятъ бо что творятъ беззаконнiи.

Ангельское воспевалъ еси, отче, славословiе, / дивному Имени Iисуса Христа, / вещая мiру забытое церковное Имяславiе,[2] / демонская же вострепета полчища, / нетерпя Славы Имени Божiя, / убояся конца своему царствiю, / восташа на тя отче Праведный, / злобою адскою и оклеветаша Тя, / мужественнаго и терпеливаго Исповедника.

• ако воспоемъ, отче Иларiоне, по достоинству, / пустынные твои подвиги молитвенныя, / чудотворче и молитвенниче предивный, / и целителю преславный, / молитвою недуги врачевалъ еси, / душевныя вкупе и телесныя, / съ верою и любовiю притекавшихъ к тебе, / прося твоей молитвенной помощи.

Преклоняимъ главы и сердца наша ко Господу, / даровавшаго намъ на последокъ временъ / дивнаго и дерзновеннаго молитвенника, / ревностнаго Исповедника Божества Имени Бога Вседержителя, / со Ангелы и всеми Святыми славящаго / дивное и пресладкое Имя Iисусово[3]/ и молящагося о душахъ нашихъ.

Слава: гласъ 8:

Давидъ Святымъ Духомъ воспеваетъ: / Не намъ, Господи, не намъ, но Имени Твоему Святому славу даждь.[4] / Въ последняя же времена архiереи глаголютъ: / славу подобаетъ воздавати Самому Богу, а не Имени Его, / Имя же Божiе есть человеческiй вымыселъ, бытiя своего не имущее. / О милостивый Господи, Спасителю нашъ! / сохрани ны отъ тяжкiя хулы имяборныя, / славу же даждь Пресвятому Имени Твоему, / да славимъ Его вся дни живота нашего / молитвами Пресвятыя Богородицы и отца нашего Иларiона великаго.

И ныне: Богородиченъ, гласъ 6:

Кто Тебе не ублажитъ, Пресвятая Дево; / кто ли не воспоетъ Твоего пречистаго Рождества; / безлетно бо отъ Отца возсiявый Сынъ Единородный, / Егоже Имя уготовано въ Предвечномъ Совете Пресвятыя Троицы / на наше избавленiе;[5] / Тойже отъ Тебе Чистыя пройде, / неизреченно воплощся, / естествомъ Богъ сый: / и естествомъ бывъ человекъ насъ ради, / не во двою лицу разделяемый: / но во двою естеству неслитно познаваемый. / Того моли Чистая, Всеблаженная / помиловатися душамъ нашимъ.[6]

Свете тихiй. Прокименъ дне.

1. Въ Воскресенье вечера, Гласъ 8: Се ныне благословите Господа вси раби Господни. Стихъ: Стоящiи во храме Господни, во дворехъ дому Бога нашего.

2. Въ понедельникъ вечера, Гласъ 4: Господь услышитъ мя, внегда воззвати ми к Нему. Стихъ: Внегда воззвати ми, услыша мя Богъ правды моея.

3. Во вторникъ вечера, Гласъ 1: Милость Твоя, Господи, поженетъ мя, вся дни живота моего. Стихъ: Господь пасетъ мя, и ничтоже мя лишитъ: на месте злачне, тамо всели мя.

4. Въ среду вечера, Гласъ 5: Боже, во Имя Твое, спаси мя, и въ силе Твоей суди ми. Стихъ: Боже, услыши молитву мою, внуши глаголы устъ моихъ. (Псал. 53,3-4).

5. Въ четвергъ вечера, Гласъ 6: Помощь моя отъ Господа, сотворшаго небо и землю. Стихъ: Возведохъ очи мои въ горы, отнюдуже прiидетъ помощь моя.

6. Въ пятницу вечера, Гласъ 7: Боже, заступникъ мой еси Ты, и милость Твоя предваритъ мя. Стихъ: Изми мя отъ врагъ моихъ Боже, и отъ востающихъ на мя избави мя.

7. Въ субботу вечера, Гласъ 6: Господь воцарися, въ лепоту облечеся. Стихъ: Облечеся Господь въ силу и препоясася.

Стихъ: Ибо утверди вселенную, яже не подвижится.

Стихъ: Дому Твоему подобаетъ святыня, Господи, въ долготу днiй.

И чтенiй пять.

Чтецъ: Исхода чтенiе. И рече Моисей къ Богу: се азъ пойду къ сынамъ Израилевымъ и реку къ нимъ: «Богъ отецъ нашихъ посла мя къ вамъ: и аще вопросятъ мя, что Имя Ему? Что реку къ нимъ? – И рече: тако речеши сыномъ Израилевымъ: Сый посла мя къ вамъ. И рече Богъ паки къ Моисею: тако речеши сыномъ Израилевымъ: Господь Богъ отецъ нашихъ, Богъ Авраамовъ, и Богъ Исааковъ, и Богъ Iаковль посла мя къ вамъ: сiе Мое есть Имя Вечное.[7] Глагола же Богъ къ Моисею и рече ему: «Азъ Господь: и явихся Аврааму, и Исааку, и Iакову, Богъ сый ихъ: Имене Моего Господь, не явихъ имъ.[8] И рече Господь: «Не возьмеши Имене Господа Бога твоего всуе: не очиститъ бо Господь, прiемлющаго Имя Его всуе».[9] Не бо поклонитеся богомъ инымъ: ибо Господь Богъ ревниво Имя, Богъ ревнитель есть.[10] Да покажу на тебе крепость Мою, и яко да проповестся Имя Мое по всей земли.[11]

Втораго закона чтенiе.

Тако глаголетъ Господь: Господа Бога твоего боишися, и Тому Единому послужиши, и къ Нему прилепишися, и Именемъ Его кленешися.[12] Десятины да даси и да снеси я предъ Господомъ Богомъ твоимъ на месте, идеже изберетъ Господь Богъ твой призывати Имя Его тамо. Да принесеши десятину пшеницы твоея… да научишися боятися Господа Бога твоего вся дни: аще же далече будетъ путь отъ тебе, и не возможеши донести ихъ, яко далече место отъ тебе, еже изберетъ Господь Богъ твой, и продаси сiе на цене.[13] «Не возможеши жрети пасху… но токмо на месте, еже изберетъ Господь Богъ твой призывати Имя Его ту.[14] Того (колено Аарона) избра Господь Богъ твой отъ всехъ племенъ твоихъ, предстояти предъ Господомъ Богомъ твоимъ, служити и благословити во Имя Господне, той и сынове его во вся дни… Да служитъ Имени Господа Бога вашего.[15] Пророка возставлю имъ отъ среды братiй ихъ, якоже тебе: и вдамъ Слово Мое во уста его и возглаголетъ имъ, якоже заповедаю ему; и человекъ той, иже не послушаетъ словесъ его, елика возглаголетъ пророкъ оный во Имя Мое, Азъ отмщу отъ него.[16] Аще не послушаете творити вся словеса закона сего, написанныя въ книге сей, еже боятися Имене честнаго и чуднаго сего, Господа Бога твоего. И удивитъ Господь язвы твоя… дондеже потребитъ Тя.[17]

Книги первыя Паралипоменона чтенiе.

Во время оно и весь Израиль взыде во градъ Давидовъ… еже вознести тамо Кивотъ Господа Бога, седяща на херувимехъ, идеже призвано есть Имя Его.[18] Въ той день устрои Давидъ въ начале хвалити Господа рукою Асафа и братiи его: исповедайтеся Господеви, и призывайте Его во Имени Его. Знаемы сотворити людемъ начинанiя Его. Пойте Ему и воспойте Ему: поведите вся чудеса Его, яже сотвори Господь. Хвалите Имя Святое Его.[19] Рече же Давидъ Соломону: чадо мне бяше въ сердце, да созижду домъ Имени Господа моего. И бысть слово Господне ко мне, глаголющее: многи крови пролiялъ еси, и многи брани сотворилъ еси, не созиждеши домъ Имени Моему… Се сынъ родится тебе… той созиждетъ домъ Имени Моему.[20] Возстаните и созидайте Святыню Господу Богу вашему, да внесется Кивотъ Завета Господня, и сосуды святыя Богови въ домъ, созидаемый Имени Господню.[21] И благослови царь Давидъ Господа предъ всемъ множествомъ, глаголя: Благословенъ еси Господи, Боже Израилевъ, Отецъ нашъ отъ века и до века… И ныне, Господи, исповедаемся Тебе и хвалимъ Имя хваленiя Твоего.[22] Господи Боже нашъ, да созиждется домъ Имени Святому Твоему.[23]

Пророчества Исаiина чтенiе.

Тако глаголетъ пророкъ: Се Богъ мой, Спасъ мой… воспойте Имя Его, возвестите во языцехъ славная Его: поминайте, яко вознесеся Имя Его. Хвалите Имя Господне.[24] Господи, Боже нашъ, прославлю Тя, воспою Имя Твое, яко сотворилъ еси чудная дела.[25] Уповахомъ на Имя Твое… Господи Боже нашъ, стяжи ны: Господи, разве Тебе иного не вемы: Имя Твое именуемъ.[26] Се Имя Господне идетъ временемъ многимъ, горящая ярость Его: со славою слово устенъ Его, слово гнева полно.[27] Яко Имя Господне велико вамъ есть.[28] Азъ Господь Богъ, сiе Мое есть Имя, славы Моея иному не дамъ.[29] Васъ ради присно Имя Мое хулится во языцехъ. Сего ради познаютъ людiе мои Имя Мое въ той день, яко Азъ есмь Самъ глаголяй, ту есмь.[30] Господь Саваофъ Имя Ему; избавивый тя, Святый Богъ Израилевъ.[31] И явлено будетъ Имя Твое въ сопротивныхъ Твоихъ.[32] Напоминайте, что велико Имя Его.[33] Услышите Глаголъ Господень трепещущiи словесъ Его: рцыте, братiе, ненавидящимъ вамъ и гнушающимся, да Имя Господне прославится, и явится въ веселiи ихъ, и они посрамятся.[34]

Пророчества Малахiина чтенiе.

Тако глаголетъ Господь: Вы священницы, презирающiе Имя Мое… Несть воля Моя въ васъ, глаголетъ Господь Вседержитель, и жертвы не прiиму отъ рукъ вашихъ. Зане отъ востокъ солнца, и до запада Имя Мое прославися во языцехъ, и на всякомъ месте фимiамъ приносится Имени Моему, и жертва чиста, зане велiе Имя Мое во языцехъ. Зане Царь велiй Азъ есмь… И Имя Мое светло во языцехъ.[35] И ныне заповедь Моя сiя къ вамъ, священницы: аще не услышите, и аще не положите на сердцахъ вашихъ, еже дати славу Имени Моему, глаголетъ Господь Вседержитель, то послю на вы клятву, и прокляну благословенiе ваше, и оклену е: и разорю благословенiе ваше, и не будетъ въ васъ, зане вы не влагаете въ сердца ваша.[36] Заветъ Мой бе съ нимъ (Моисеемъ) жизни и мира, и дахъ ему боятися Мене, и отъ лица Имене Моего устрашатися ему… Вы же растлисте заветъ Левiинъ.[37] И написа книгу памяти предъ собою боящимся Господа и благоговеющимъ Имя Его.[38] И возсiяетъ вамъ, боящимся Имене Моего, Солнце правды и исцеленiе въ лучахъ его.[39]

Ектенiя, Рцемъ Вси: ( Господи помилуй, 12).

Сподоби, Господи:

Ектенiя просительная: (подай, Господи, 12)

На литiи стихиры, гласъ 8:

Славу и Величiе Имени Господа Вседержителя, / на льстивыя речи имеборческiя, / не поменялъ еси, отче Иларiоне, / сего ради усердно молимъ тя: / молися ко Господу о насъ чадахъ твоихъ, / устояти въ вере во Имя Господа Бога нашего[40] / до конца живота нашего.

Слава Сладчайшему Имени Iисусъ Христову,[41] / да будетъ возносима филадельфiйцами[42] / исповедниками Божества Имени Божiя, / слово терпенiя сохранившими, / и отъ Имени Господня не отрекшимися,[43] / твоимъ Отче у престола Божiя ходатайствомъ, / въ маломъ бо количестве исповедниковъ,[44]/ якоже рече Iоаннъ Богословъ, / Имя Пресвятыя Троицы славящихъ, / ими же Церковь Христова сохранится до скончанiя века.[45]

Глас 6. Страдая на земли исповеданiя ради / Преславнаго Имени Господа, / по кончине сподобился еси отче Иларiоне, / великихъ обетованiй Божiихъ, / сохранившимъ слово терпенiя, / и отъ Имени Божiя не отрекшимся;[46] / Его же на небеси ныне славиши / со Ангелы и всеми Святыми / и молишися усердно ко Господу, / о всехъ любовiю чтущихъ память твою / и съ умиленiемъ славящихъ Имя Господне[47].

Слава: гласъ 2:

Церковь Небесная Торжествующая, / и воинствующая Церковь земная, / дивное Имя Твое, Iисусе Спасе нашъ, / вкупе воспеваютъ торжествующе,[48] / Ему же поклоняются Ангели и человецы;[49] / глаголетъ бо апостолъ Петръ: / несть инаго Имене, кроме Iисусова, / имже подобаетъ спастися намъ.[50] / На конецъ же вековъ явися имяборное отступленiе, / еже апостолъ Павелъ возвестилъ.[51] / Самъ Господь открылъ Божество Своего Имени: / «Азъ Господь Богъ, Сiе Мое есть Имя Вечное»[52]. / Избави Господи, отступленiя от веры в Пресвятое Имя Твое, / и пребуди съ нами до скончанiя века, яко обещалъ еси,[53] / Иларiона угодника Твоего святыми молитвами.

И ныне: Богородиченъ, гласъ 6:

Дево Всенепорочная, / яже пресущнаго Бога неизреченно рождшая, / со безплотными Того непрестанно моли / оставленiе прегрешенiй, / и исправленiя житiя дати нам прежде конца, / верою и любовiю поющимъ Тя, по долгу, / едина Мати Божiя, Всепетая.

На стиховне стихиры, гласъ 4:

Яко ангелъ во плоти, пустынниче, / любимый нашъ отче Иларiоне, / о мiре приносящiй молитвы твои ко Господу, / наипаче о исповедникахъ Имени Божiя, / радостно ныне со Ангелы и Святыми на небеси, / славяще Имя Господне, / не забуди и насъ твоимъ путемъ идущихъ, / Имя Божiе славящихъ, / просящихъ усердныхъ молитвъ твоихъ ко Господу, / да избавимся отъ сетей сына погибели, / Имени ради Iисуса Сладчайшаго.

Стихъ: Принесите Господеви славу и честь, / принесите Господеви Славу Имени Его[54].

Гласъ 6: Великий исповедниче, любимый отче наш Иларiоне, / усердно со слезами прибегаемъ къ тебе, / ходатайствомъ твоимъ предъ Господомъ, / и Царицею спасенiя нашего / Пресвятою Девою Богородицею: / сохрани насъ отъ соблазновъ и потопленiя греховнаго, / отъ тайныхъ коварныхъ сетей вражiихъ,[55]/ святую память твою верою совершающихъ, / и вдохновенно прославляющихъ Имя Господне.[56]

Стихъ: Господи Господь нашъ, / яко чудно Имя Твое по всей земли![57]

Ключъ разуменiя Давидовъ,[58] / си есть Имя Iисуса Сладчайшаго, / проразумелъ еси благодатiю отче Иларiоне, / открывающiй тайну беззаконiя / въ похуленiи Имени Господня, / возвещенную Павломъ апостоломъ;[59] / да познаютъ ю избранники Божiи, / еже въ действiи быша въ Апостольскiе времена, / совершилась же на конце вековъ, / отступленiемъ отъ Имени Божiя Iисусъ, / знаменующаго и являющаго Искупленiе[60].

Слава: гласъ 7

Придите вернiи Христолюбцы, / добрый подвигъ пустынника Кавказскаго созерцаимъ, / за Имя Господне претерпевшаго гоненiя, / отъ истины же Имяславiя не отрекшагося, / въ немъ же утвердилъ еси множайшiя ученики своя; / темже песни приносимъ ти похвальныя: / и усердно отче Иларiоне молимъ тя, / предстоиши бо присно у престола Живоначальныя Троицы, / не забуди и насъ усердно творящихъ святую память твою, / вознеси о насъ ко Господу святыя молитвы твоя, / во еже сохранити намъ правоверiе / во дни искушенiя вселенныя,[61] / и до кончины нашея купно съ тобою, / со Ангелы и всеми Святыми / Имя Троицы Единосущныя славити во вся веки.

И ныне: гласъ 6:

Царица Небесная, / Пресвятая Богородице! / Ты, Всечистая въ лобзанiи съ праведною Елисаветою, / прославила еси Имя Сына Своего Iисуса любимаго, / въ божественномъ восторге воспела еси: / «яко сотвори Мне величiе Сильный… и Свято Имя Его!»[62]; / богоборные же архiереи, Имени Iисуса Божество отрицая, рекутъ, / яко сие простое есть имя человеческое, / меньшее всехъ Именъ Божiихъ. / О, Всеблагая Мати, / Заступница наша усердная, / не можно терпети хулы имяборныя! / Избави насъ обольщенiя вражiя, / поразившаго духовенство россiйское, / и отъ тяжкiя хулы на Имя возлюбленнаго Сына Твоего, / но сподоби насъ выну славити / Имя Iисуса Сладчайшее!

Ныне отпущаеши: Трисвятое, по Отче нашъ:

Тропарь, гласъ 4:

Пустынный житель горняя мудрствуя, / непрестанно Имя Христово въ сердце нося, / сподобился единенiя сердечнаго съ Господомъ, / молитвою Iисусовой, / юже преподалъ еси ученикомъ твоимъ, / любящимъ Iисуса Господа своего. / Тем же, отче Иларiоне молимъ тя: / научи и насъ непрестанной молитве сей, / и молися ко Господу спастися душамъ нашимъ.

Слава: инъ Тропарь, гласъ 4:

Яко труба велегласная, / возвестившая близость Суднаго Дне, / избраннымъ открывшая «тайну благочестiя» въ исповеданiи Имен Пресвятыя Троицы, / «тайну же беззаконiя» въ имяборчестве; / слуга Господень, ревнителю Славы Имени Божiя, / твоими, отче, Иларiоне, молитвами ко Господу / сохраняй насъ в годину испытанiя живущихъ на земле, / вписаннымъ и неизглажденным быти изъ книзи жизни вечныя,[63] / славы ради Имени Iисуса Сладчайшаго,/ тобою проповеданнаго, / съ верою и любовiю почитающихъ тя.

И ныне, Богородице Дево, Радуйся… гласъ 4:

Поемъ: Буди Имя Господне благословенно отъ ныне и до века. (трижды).

Слава, и ныне…

Благословлю Господа на всякое время… (псал. 33) до: не лишатся всякаго блага.

И: Шестопсалмiе.

На утрени,

По шестопсалмiи, Ектенiя великая. (или: Господи помилуй, 12 , и: Аминь)

Богъ Господь, и явися намъ: гласъ 4:

Тропарь святаго, гласъ 4:

Пустынный житель, горняя мудрствуя: (см. выше)

Слава: инъ Тропарь, гласъ 4:

Яко труба велегласная: (см. выше)

И ныне: Богородичен, гласъ 4:

Безневестная Дево, / Бога неизреченно плотiю рождшая / на спасенiе мiру, / молимъ Тя, Заступнице, Неискусомужная Мати: / моли Сына Твоего и Бога нашего: / даровати намъ греховъ оставленiе, / лютыхъ же испытанiй избавленiе, / прославляющимъ Имя возлюбленнаго Сына Твоего Iисуса, / и Твое славящихъ благодатное Имя, / Дево Пречистая, /,.

Таже стихословимъ кафизмы, по уставу.

Поется: Господи помилуй, Господи помилуй, Господи помилуй, слава Отцу и Сыну и Святому Духу.

Чтецъ: И ныне и присно, и во веки вековъ, аминь.

И чтетъ 1-ю кафизму (по уставу).