Преподобному Иларiону.

Тропарь, гласъ 4:

Пустынный житель горняя мудрствуя, / непрестанно Имя Христово въ сердце нося, / сподобился единенiя сердечного съ Господом / молитвою Iисусовой, / юже преподалъ еси ученикомъ твоимъ, / любящимъ Iисуса Господа своего. / Темъ же, отче Иларiоне, молимъ тя: / научи и насъ непрестанной молитве сей, / и молися ко Господу, спастися душамъ нашимъ.

инъ Тропарь, гласъ 4:

Яко труба велегласная, / возвестившая близость Суднаго Дне, / избраннымъ открывшая «тайну благочестiя» / в исповеданiи Имени Пресвятыя Троицы, / «тайну же беззаконiя» въ имяборчестве; / слуга Господень и ревнителю Славы Имени Божiя, / отче Иларiоне преподобне, / молитвами твоими ко Господу / сохраняй насъ въ годину испытанiя живущихъ на земле, / неизглажденнымъ быти изъ книги жизни вечныя,[9] / славы ради Имени Iисуса Сладчайшаго, / тобою проповеданнаго, / съ верою и любовiю почитающихъ тя.

Тропари: Дневной, и Святому на числе по месяцеслову.

И поемъ: Трисвятое.

Чтецъ: Прокименъ, гласъ 4:

Дивенъ Богъ во святыхъ Своихъ, Богъ Израилевъ.

Ликъ: Дивенъ Богъ во святыхъ Своихъ, Богъ Израилевъ.

Чтецъ, Стихъ: В церквахъ благословите Бога, Господа отъ источникъ Израилевыхъ.

Ликъ: Дивенъ Богъ во святыхъ Своихъ, Богъ Израилевъ.

Чтецъ: Дивенъ Богъ во святыхъ Своихъ.

Ликъ: Богъ Израилевъ.

Апостолъ ко евреемъ, зач. 330.

Чтецъ: Ко Евреемъ посланiя святаго Апостола Павла чтенiе.

Братiе, святiи вси верою победиша царствiя, содеяша правду, получиша обетованiя, заградиша уста львовъ: угасиша силу огненную, избегоша острея меча, возмогоша отъ немощи, быша крепцы во бранехъ, обратиша въ бегство полки чужихъ. Прiяша жены отъ вескресенiя мертвыя своя: инiи же избiени быша, не прiемше избавленiя, да лучшее воскресенiе улучатъ: Друзiи же руганiемъ и ранами искушенiе прiяша, еще же и узъ и темницъ. Каменiемъ побiени быша, претрени быша, искушени быша, убiйствомъ меча умроша, проидоша въ милотех, и въ козiяхъ кожахъ, лишени, скорбяще, озлоблени: Ихже не бе достоинъ /весь/ мiръ, въ пустыняхъ скитающеся и въ горахъ, и въ вертепахъ, и въ пропастехъ земныхъ. И сiи вси послушествовани бывше верою, не прiяша обетованiя: Богу лучшее что о насъ предзревшу, да не безъ насъ совершенство прiимутъ. Аллилуiа, аллилуiа, аллилуiа.

Ликъ: аллилуiа (трижды)

Чтецъ, стихъ: Воззваша праведнiи, / и Господь услыша ихъ.

Ликъ: аллилуiа (трижды).

Евангелiе отъ Луки, зачало 64.

Чтецъ: (если без священника) Отъ Луки Святаго Евангелiя членiе.

Ликъ: Слава Тебе Господи, слава Тебе.

Чтецъ: Рече Господь: всякъ, иже аще исповесть Мя предъ человеки, и Сынъ Человеческiй исповесть его предъ Ангелы Божiими: А отвергiйся Мене предъ человеки, отверженъ будетъ предъ Ангелы Божiими. И всякъ, иже речетъ слово на Сына Человеческаго, оставится ему: а на Святаго Духа хулившему не оставится. Егда же приведутъ вы на соборища и власти и владычества, не пецытеся, како или что отвещаете, или что речете: Святый бо Духъ научитъ вы въ той часъ, яже подобаетъ рещи.

Ликъ: Слава Тебе Господи, слава Тебе.

После чтенiя Евангелiя полагается заупокойная Ектенiя. (Аще нет iерея, поется заупокойное Господи помилуй 12 разъ, и поминаются усопшiе въ правой вере. А усопшiе въ общенiи съ имеборной антицерковью сродники, поминаются съ прибавкой: «Аще возможно», помяни Господи… А закоренелые имяборцы, безбожники и другiе еретики, вообще не поминаются, ихъ предавать на волю Божiю.

После поминовенiя

Прочее Изобразительныхъ (Обедницы) по Часослову:

Чтецъ: Помяни насъ Господи, егда прiидеши во царствiи Твоемъ. Помяни насъ Владыко, Егда прiидеши во царствiи Твоемъ. Помяни насъ Святый, Егда прiидеши во царствiи Твоемъ.

Слава, и ныне:

Ликъ небесный поетъ Тя и глаголетъ: Поется: Свят, Святъ, Святъ Господь Саваофъ, исполнь небо и земля славы Твоея.

Стихъ: Приступите къ Нему и просветитеся, и лица ваша не постыдятся. Лик небесный поетъ Тя и глаголетъ: Поется: Святъ, Святъ, Святъ Господь Саваофъ, исполнь небо и земля славы Твоея.

Слава: Ликъ святыхъ Ангелъ и Архангелъ со всеми небесными силами, поетъ Тя, и глаголетъ: Поется: Святъ, Святъ, Святъ Господь Саваофъ, исполнь небо и земля славы Твоея.

Чтецъ: И ныне…

Ликъ: Верую во единаго Бога Отца…

Чтецъ: Ослаби остави… Ликъ: Отче нашъ…

Имени Божiю. Кондакъ, гласъ 4:

Яко да Имя Мое не осквернится предъ языки… / вы же доме Израилевъ, / сице глаголетъ Адонаи Господь: / кiйждо кумиры своя отымите, / и аще послушаете Мене, / и Имени Моего Святаго не осквернавити…/ И познаете, яко Азъ Господь, / да Имя Мое не осквернится злыми путями вашими.[10]

Сладчайшему Имени Iисусъ

Кондакъ, гласъ 6:

Царское Имя Iисусъ / на небеси и на земли царствующее: / на небеси все естество Ангельское / безпрестанно славитъ Пресвятое Имя Твое, Iисусе,[11] / на земли людiе возносятъ туюжде песнь, / составляется общее торжество / небесныхъ и земныхъ существъ вкупе славящихъ Тя. / Iисусе, Спасительное Имя, помилуй мя.[12]

инъ Кондакъ, гласъ 6:

Имя Твое Iисусе Спасе нашъ, / аки солнце мiръ облеста, / аки мvро благовонное вселенную облагоуха: / удиви Ангеловъ, обрадова человековъ, / устраши бесовъ, / прогоняется мракъ имеборчества, / благочестiя же Имяславия возсiяваетъ светъ, / и просвещаетъ всякаго человека, въ мiръ грядущаго.[13]

Покрову Пресвятой Богородицы.

Кондакъ, гласъ 3:

Дева днесь предстоитъ въ Церкви, / и съ лики святыхъ за ны невидимо молится Богу: / Ангели со архiереи покланяются, / Апостоли же со Пророки ликовствуютъ: / насъ бо ради молитъ Богородица превечнаго Бога.

Преподобному Иларiону.

Кондакъ гласъ 6:

Тщету мiра Христа ради возненавидевъ, / въ горныхъ пустыняхъ Кавказа вселился еси, / идеже множество учениковъ собралъ еси, / поучая всехъ непрестанной Iисусовой молитве; / за Божество Имени Господня претерпевый гоненiе, / исповедниче и молитвенниче отче Иларiоне, / научи и насъ недостойныхъ молитве Iисусовой, / почитающихъ великiя подвиги твоя, / испроси намъ у Господа велiю милость: / соблюсти правую веру во Имя Господне, / съ верою и любовiю прославляя Его, / и спастися душамъ нашимъ.

Кондаки: Дневной и Празднуемаго Святаго по месяцеслову.

Чтецъ: Слава…

Ликъ: Со святыми упокой…

Чтецъ: И ныне…

Ликъ: Предстательство христiанъ непостыдное:

Чтецъ: Господи помилуй 12 разъ, и:

Всесвятая Троице…

Ликъ: Буди Имя Господне благословенно… трижды

Слава, и ныне…

Ликъ: Благословлю Господа… (Псал. 33)

Достойно есть яко воистину…

Слава и ныне: Господи благослови:

Молитвами святыхъ отецъ нашихъ, Господи Iисусе Христе Боже нашъ, помилуй насъ. Аминь.

Песнопенiя въ конце службы:

Утвержденiе на Тя надеющихся, / утверди Господи Церковь, / юже стяжалъ еси / честною Твоею кровiю (Трижды).

Утверди Боже, / святую православную веру, православныхъ христiанъ, / во векъ века.

Всю братiю нашу и вся православныя христiаны, / Господи помилуй, Господи помилуй, Господи помилуй, / Господи сохрани ихъ на многая лета!

Упованiе мое Отецъ, / прибежище мое Сынъ, / покровъ мой Духъ Святый: / Троице Святая, слава Тебе.

Богородице Дево, / упованiе христiаномъ, / покрый, соблюди, и спаси на Тя уповающихъ.

Не имамы иныя помощи, / не имамы иныя надежды, / разве Тебе Владычице, / Ты намъ помози, / на Тебе надеемся, / и Тобою хвалимся, Твои бо есмы раби, / да не постыдимся.

Все упованiе мое на Тя возлагаю, / Мати Божiя, / сохрани мя подъ кровомъ Твоимъ.

Владыко Христе Царю Многомилостиве, / прiими молитвы рабъ Твоихъ, / и избави насъ, отъ всякiя нужды и печали.

Владычице, / прiими молитвы рабъ Твоихъ, / и избави насъ, / отъ всякiя скорби и болезни.

Господи помилуй, / Господи помилуй, / Господи помилуй. / Аминь.

Господи мой Господи, / Пастырь мой родной, / спаси меня отъ ада, / будь всегда со мной.

Слава Ему во веки!

Аминь.

АКАФИСТЪ

Преподобному Отцу нашему

Иларiону Кавказскому

Автору книги «На горах Кавказа». Его же память:

Рождество 27 декабря (1848). Кончина 1 марта

1916.

Выпускъ 2-й.

Кондакъ 1

Избранный Богомъ быти орудiемъ испытанiя вселенней, / предреченнаго Тайнозрителемъ Iоанномъ Богословомъ, / посланного испытати всехъ живущихъ на земле[14] / на любовь къ Сладчайшему Имени Iисуса, / вкупе со Iоанномъ Кронштадтскимъ Иларiоне богодухновенно рекъ: / Имя Божiе, есть Самъ Богъ. / Якоже рече Господь Вседержитель: / «Азъ Господь Богъ, сiе Мое есть Имя вечное»,[15] / Имя Господа – Самъ Господь Духъ везде сый и вся исполняяй; / имя Богоматери – Богомати; / имя Ангела – Ангелъ, Святаго – Святый.[16] / Сiе Православное богословiе прiемлемъ и лобызаемъ, / и отъ умиленнаго сердца нашего взываемъ ти: / Радуйся, Иларiоне, новый исповедниче и молитвенниче о душахъ нашихъ.

I к о с ъ 1

Любовiю ко Господу облекшись, оставилъ мiръ и яже въ мiре, любителю Iисусовъ Иларiоне, святые обители Россiйскiя обтеклъ еси, взыскуя душе единаго напотребу, и достигъ еси Святыя Горы Афонскiя, и тамо во иноческiй образъ облекшися, подвизался еси въ посте, молитве и послушанiи. Ублажаемъ святое желанiе твое спасти душу свою, и съ любовiю приносимъ ти сiя похвалы:

Радуйся, отрекшiйся отъ мiра, ради Небеснаго Райскаго блаженства;

Радуйся, Христа Бога пресладкаго паче всего мiра возлюбивый;

Радуйся, яко Бога ради возложилъ еси на себя иго иноческаго житiя;

Радуйся, всемъ сердцемъ твоимъ возлюбивый Господа Бога;

Радуйся, Боголюбче, ни во что вменивый вся красная мiра сего;

Радуйся, пустыннолюбче, мiрскихъ сладостей отрекшiйся Христа ради;

Радуйся, сладкоуханный крине, облагоухавшiй пустыни кавказскiя;

Радуйся, яко зренiемъ горныхъ красотъ Кавказа утвердилъ еси веру въ Творца мiровъ;

Радуйся, яко преобиделъ еси мiръ любленiемъ Сладчайшаго Iисуса;

Радуйся, давый образъ кротости, смиренiя и любви къ Сладчайшему Имени Iисусову;

Радуйся, сладкопеснивый соловей воспевающiй Имя Божiе на небеси, якоже славилъ Его и на земли;

Радуйся, мужественный вождь земнаго ополченiя исповедниковъ въ брани за Имя Господне;

Радуйся, Иларiоне, новый исповедниче и молитвенниче о душахъ нашихъ.

Кондакъ 2

Видя имевшiй на тебе совершитися промыселъ Божiй, егда прiиде обитель Афонская въ расцветъ духовный, возжелаша отцы Афонстiи и на Родине создати подобную иноческую обитель, послаша строителей созидати «Новый Афон», и съ ними тебе отче Иларiоне. Ты же съ радостiю и любовiю воспрiялъ еси жребiй той. Дивящеся таковому о тебе благоизволенiю Господа Бога, умиленно взываемъ Ему: Аллилуiа.

I к о с ъ 2

Разумея Божiе определенiе о тебе, угодниче Божiй Иларiоне, ведущiй всехъ ко спасенiю чрезъ познанiе «тайны Благочестiя» и «тайны беззаконiя», тебе, яко исполнителю воли Бога, с умиленiем взываемъ:

Радуйся, послушный слуга Господень, исполнитель воли Отца Небеснаго;

Радуйся, смиренный послушниче посреде строителей Новаго Афона;

Радуйся, любителю безмолвныхъ Кавказскихъ пустынь;

Радуйся, яко стяжалъ еси молитву Iисусову непрестанную;

Радуйся, горячiй любителю Господа Iисуса;

Радуйся, ничесоже любивый, паче сердечной Iисусовой молитвы;

Радуйся, о всемъ мiре усердный молитвенниче;

Радуйся, мудрый наставниче молитвы Iисусовой;

Радуйся, ревностный защитниче Славы Имени Божiя;

Радуйся, блюстителю чистоты веры и целомудрiя;

Радуйся, смиренный исполнитель на тебе воли Господа Бога;

Радуйся, красота собора пустынниковъ Кавказскихъ;

Радуйся, Иларiоне, новый исповедниче и молитвенниче о душахъ нашихъ.

Кондакъ 3

Силою благодатною свыше осеняемый, явился еси въ среде строителей Новоафонскiя обители истинный любителю Господа Iисуса, и томимый жаждою единенiя съ Господомъ, отлучался на пустынное безмолвiе, и тамо воспевалъ Богокрасную песнь: Аллилуiа.

I к о с ъ 3

Имея Богодухновенную ревность о Славе Имени Сладчайшаго Iисуса, и горя желанiемъ соединиться съ Нимъ, уединялся еси въ безлюдные пустыни деланiя ради молитвы Iисусовой, съ нею же не разлучался еси до последняго издыханiя. Воспоминая горячую любовь твою ко Господу и великое смиренiе, ими же стяжалъ еси умносердечную молитву Iисусову, восхваляемъ тя, отче Иларiоне, принося недостойныя наши похвалы:

Радуйся, яко ревностнымъ горенiемъ и любленiемъ Iисуса Сладчайшаго возвысился еси до небесныхъ высотъ Райскихъ;

Радуйся, неустанный труженикъ на ниве умно-сердечного деланiя;

Радуйся, дивный пустыннолюбче неизменный;

Радуйся, прекрасный садоделателю нивы Христовы;

Радуйся, пустынные труды и лишенiя любве ради Христовой претерпевый;

Радуйся, яко горелъ еси любовiю къ Богу и ближнимъ;

Радуйся, смиренный и терпеливый подвижниче благочестiя;

Радуйся, яко лучъ света Божественнаго въ нощи греховней людямъ возсiявый;

Радуйся, всему мiру образъ кротости, любви и терпенiя подавый;

Радуйся, прогонителю демоновъ Именемъ Iисусовымъ;

Радуйся, гласъ Божiй прiемый въ сердце своемъ прославляти Имя Господне;

Радуйся, верный любителю и послушниче Царя Небеснаго;

Радуйся, возлюбленный Богомъ исповедниче пресладкаго Имени Его;

Радуйся, присный съ Богомъ молитвою собеседниче;

Радуйся, яко готовъ былъ умереть за честь и славу Имени Господа Iисуса;

Радуйся, Иларiоне, новый исповедниче и молитвенниче о душахъ нашихъ.

Кондакъ 4

Бури житейскихъ наважденiй избеглъ еси преподобне Иларiоне, возлюбивъ пустынное житiе, иго Христовыъ заповедей нося на рамехъ своихъ, изнуренiемъ плоти твоея и подвигомъ непрестанной молитвы Iисусовой утомилъ еси томящаго тя дiавола; трепещетъ бо сатана и трясется не терпя опаляющей Божественной силы Имени Iисусъ Христова. И сего ради, отче, всемъ сердцемъ воспевалъ Богу: Аллилуiа

I к о с ъ 4

Тако возлюбил еси пустынное житiе безмолвное, яко, по устройству обители Новоафонскiя удалился еси в далекiя дебри Кавказа, изнуряя плоть, обходил еси пустынные горы и леса, пламенея любовiю к Богу, восходя отъ силы въ силу, и на земли пребывалъ, яко ангелъ безплотенъ на небеси, побеждая Именемъ Iисусовымъ наважденiя и козни бесовскiе. Мы же, воспоминая труды и подвиги твоя, Царствiя ради Небеснаго, съ умиленiемъ приносимъ ти похвалы сiя:

Радуйся, великiй подвижниче, столпъ правоверiя и благочестiя;

Радуйся, Церкви Христовой лампада неугасимая истинной молитвы;

Радуйся, любителю пустыннаго безмолвiя;

Радуйся, учителю смиренiя, терпенiя и послушанiя.

Радуйся, истинный наставниче покаянной молитвы Iисусовой;

Радуйся, путеводителю въ горнiе обители;

Радуйся, подражателю въ подвигахъ благочестiя святымъ отцамъ Церкви Христовой;

Радуйся, наставниче духовныхъ чадъ твоихъ на путь спасенiя;

Радуйся, со строгостiю и смиренiе въ себе совокупивый;

Радуйся, никого же обидевый, ниже соблазнивый подвижниче Христовъ;

Радуйся, любителю и делателю непрестанной умно-сердечной молитвы Iисусовой;

Радуйся, провозвестниче спасительности Имени Iисусова;

Радуйся, яко книга твоя «На горах Кавказа», по реченiю Цензуры Духовной, «написана писаломъ любви Отчей»;

Радуйся, Иларiоне, новый исповедниче и молитвенниче о душахъ нашихъ.

Кондакъ 5

Благодатiю Святаго Духа руководимый, прославленiя ради Сладчайшаго Имени Iисусова, обрелъ еси Иларiоне многiя ученики: жаждущия научая непрестанной молитве Iисусовой, творити ю во смиренiи и покаянiи о гресехъ своихъ. Они же съ радостiю и любовiю прiявъ святые наставленiя твоя, воспевали песнь Богу: Аллилуiа.

I к о с ъ 5

Видевше дiаволъ ревность твою о Славе Имени Божiя, воздвигъ лютое гоненiе на тя чрезъ сотрудниковъ своихъ имяборцевъ, оклеветавшихъ истинное православное ученiе твое о Славе Имени Бога, аки бы о четыре ипостаси Божества. Мы же удивляяся великому терпенiю твоему и твердости въ заповеданной Богомъ вере твоей во Имя Его,[17] песненно восхваляемъ тя:

Радуйся, великiй столпъ исповедничества;

Радуйся, хранителю истинной веры Православной во Имя Божiе;

Радуйся, кознями вражiими непобедимый исповедникъ истинного Православiя въ Имяславiи;

Радуйся, обличителю имяборческаго нечестiя;

Радуйся, яко въ книзе «На горахъ Кавказа» ревностно прославилъ еси Имя Господне;

Радуйся, яко книга твоя обличила нечестiе имяборческаго духовенства последняго времени;

Радуйся, богомудрый обличителю имяборчества iерархiи;

Радуйся, яко книга твоя служитъ вернымъ христiанамъ компасомъ и пищею духовною;

Радуйся, яко книга твоя любителямъ молитвы Iисусовой служитъ незаблуднымъ руководствомъ;

Радуйся, яко книга твоя содержитъ Откровенiе Божiе истиннаго пути ко спасенiю;

Радуйся, яко книга твоя избрала соль мiра – исповедниковъ Имени Божiя, хранящихъ чистоту Православiя;

Радуйся, богоглагольниче, словомъ Божiимъ обуздавый хульныя уста имяборцевъ;

Радуйся, прозорливый предсказателю грядущаго гнева Божiя на Россiю и церковь за похуленiе Имени Божiя Ангелами церкви[18]– Синодомъ и патрiархами;

Радуйся, предзревый въ имяборной ереси приближенiе Дня Суднаго;

Радуйся, Иларiоне, новый исповедниче и молитвенниче о душахъ нашихъ.