На хвалитехъ стихиры, гласъ 8:

Ни слава мiра сего, ни славный родъ дворянскiй, / ни высокое офицерское званiе,[1] / ни карьера служебная и прелести мiра сего, / не прельстиша тя, отче Антонiе, / но ты, воинъ Христовъ явился еси непобедимый, / взыскавшiй единаго напотребу души своея, / оное и повлече тя въ обитель Афонскую, / и мундиръ офицера сменилъ еси на доспехи монашескiя: / параманъ, анолавъ и четки монашескiя. / О, Боже, неисповедимы пути Твои! / И облекшись во всеоружiе Святое, / сталъ еси блестящимъ воиномъ Христовымъ, / и мечемъ духовнымъ Словомъ и Именемъ Iисусовымъ / поражалъ еси полки демоновъ и искушенiя вражiя. / Егда же очистилъ сердце свое молитвою умносердечною, / повеле ти Господь выступити противу хулителей Имени Его. / – О, мудрому промыслу и милости Божия на тебе, отче Антонiе! / молися усердно о насъ ко Господу, / да осенитъ насъ, грешныхъ и недостойныхъ, милость Его, / шествовати твоимъ путемъ исповедническимъ, / молитвами Богородицы и всехъ Святыхъ.

Изнуряя плоть, укреплялъ еси духъ свой, / Словомъ Божiимъ и непрестанной молитвою, / нося посреде персей Сладчайшее Имя Iисуса Христа, / Егоже возлюбилъ еси, Емуже и жизнь свою посвятилъ еси, / за Негоже многiя скорби и козни от имяборцев неисчетныя претерпелъ еси; / за сiе увенча тя Господь венцемъ небеснымъ, / и ликуеши ныне на Небеси со Ангелы и всеми Святыми, / выну прославляя Имя Пресвятыя Троицы. / Сего ради, молимъ тя дорогой нашъ отче Антонiе: / вознеси къ Богу усердные молитвы о насъ, духовныхъ чадахъ твоихъ, / сохранити до конца правую веру во Имя Господне, / и твоими молитвами спастися душамъ нашимъ.

Гласъ 6: Память о тебе, отче Антонiе, незабвенная, / труды твоя о Имене Господни неисчетныя, / и велiя ревность твоя о славе Имени Божiя, / молитвы твои о Россiи и Царе нашемъ деннонощныя, / литургiи твои ежедневныя, / и что еще недокончалъ еси, / воеже воспрiяти венецъ священномученика? / Но убiенъ злодеями въ родительскомъ доме села Луцыковка, / и сподобился отъ Господа венца священномученика, / многихъ ради трудовъ твоихъ во славу Имени Божiя. / Молися о насъ, священномучениче отче Антонiе, / любовiю святую твою память совершающихъ.

Гласъ 8: Изнемогаетъ немощный духъ нашъ, / достойно воспети подвиги твоя, отче Антонiе, / о спасенiи и въ борьбе съ окаянными имяборцами, / яко и книгу свою озаглавилъ еси: / «Моя борьба съ имяборцами на Святой Афонской Горе». / Дивимся воинскому мужеству воина Христова, / откуду сiе въ тебе? въ молчанiи недоумеемъ мы: / Дивенъ Богъ, укрепляющiй Святыхъ Своихъ, / дающiй благодатную силу въ борьбе за истину! / Слава Славе Твоей Господи и чудна дела Твоя! / Благодаримъ Тя, Господи Боже нашъ, / яко даровалъ еси намъ славнаго исповедника, и воина, / наставника и дерзновеннаго молитвенника. / Его же молитвами, помилуй, и спаси насъ.

Гласъ 6: Добрая память наша о тебе отче Антонiе, / украсивый кровiю мученической венецъ исповедническiй, / и утвердивый шествовати имяславческимъ путемъ братiй твоихъ, / приносящихъ Господу Богу благодаренiе, / за таковаго кормчего и наставника,/ молитися непрестанно прославляя Имя Господне./ Буди духомъ твоимъ съ нами всегда, / укрепляй въ вере во Имя Господне, / въ Филадельфiйской Церкви намъ пребывати, / сохраняющей слово Господне, / и отъ Имене Божiя не отрекшейся.

Слава: гласъ 8:

Отче священномучениче Антонiе, / отъ любве сердечныя еже мощно силамъ нашимъ, / сiе приносимъ ти благодарственное хваленiе, / ты же, ведая слабость, и немощь нашу, / не возгнушайся нашею малою лептою, / благодаримъ за яже содеялъ еси намъ во спасенiе, / за истинное богословiе Имени Божiя, / укрепляющее насъ на пути исповедническомъ. / Молися, наставниче у престола Всевышняго, / и моли Владычицу нашу Пресвятую Богородицу, / умолити Сына Ея и Бога нашего, / прощенiе греховъ даровати намъ / и спастися душамъ нашимъ.

И ныне: гласъ 6:

День Судный страшитъ мя окаяннаго, / всеми грехами повиннаго, / яко Судъ безъ милости, не сотворшему милости, / и тартаръ, и червь лютый, и скрежетъ зубовный, / и огнь неугасаемый ждетъ окаянную душу мою. / Но Ты, Всеблагая, за всехъ Заступнице, / прибегающихъ к Тебе с мольбою: / помилуй, защити и спаси мя, / отъ лютыхъ ожидающих мя обстоянiй, / милостiю Твоею, Пресвятая Дево Мати, / и милостiю Сладчайшаго Твоего Сына возлюбленнаго.

Великое славословiе.

Тропарь, гласъ 4:

Ревностный обличителю имяборнаго отступленiя / отъ Божества Имени Божiя / и отъ истиннаго Православiя; / провозвестниче царю земному кары Царя Небеснаго / за грехъ Синода, похулившаго Имя Господне, / дивный пророче и усердный молитвенниче, / подобный Илiи ревнителю Славы Имени Божiя, / из земнаго воина преобразивыйся в воина Царя Небеснаго, / преславный отче Антонiе, / молися усердно о насъ ко Господу, / любовiю почитающихъ святую память твою.

Ектенiя: Помилуй насъ Боже: (Господи помилуй 12, и: Аминь).

И отпустъ. Утверди Боже, святую православную веру, православныхъ христiанъ во векъ века.

И часъ 1-й. По молитве: Христе, Свете истинный: Взбраннной Воеводе победительная: Слава: И ныне: Господи помилуй (трижды), Благослови: Молитвами святыхъ отецъ нашихъ, Господи Iисусе Христе Боже нашъ, помилуй насъ. Аминь.

Часы.

3-й часъ (если нет священника): Молитвами святыхъ отецъ нашихъ, Господи Iисусе Христе Боже нашъ, помилуй насъ. Аминь.,

Чтецъ: Начало обычное.

На часехъ тропарь и кондакь Святому.

Въ начале Литургiи и Изобразительныхъ

полагается заздравная Ектенiя. Если безъ iерея, Господи помилуй 12, и поминаются сущiи въ правой вере. О еретикахъ, или находящихся въ общенiи съ имеборной антицерковью и о неверующихъ, молиться не «спаси Господи и помилуй», а: вразуми, и обрати ихъ, Господи, къ правой вере и къ покаянiю.

Последованiе Изобразительныхъ.

Благослови душе моя Господа:

Слава: Хвали душе моя Господа:

И ныне: Единородный Сыне:

Блаженны. Во царствiи Твоемъ:

На блаженны, отъ Канона на 6, песнь 3 и 6.

Слава: гласъ 6:

Времена гоненiй на Церковь Христову / за Имя Господа Iисуса, / начашася отъ земныя жизни Спасителя нашего, / имутъ продолжатися до скончанiя века, / отъ неверныхъ архiереевъ и безбожныхъ слугъ антихристовыхъ, / якоже Самъ Господь предсказалъ. / Укрепи насъ, Господи, въ правоверiи, / исповедниками пребыти до скончанiя века.

И ныне: гласъ 4

Се Дева прiиметъ во чреве / и родитъ Сына / и нарекутъ Имя Ему Еммануилъ,[2] / еже есть Искупитель отъ века, / якоже глаголетъ Исаiя;[3]/ Iисусъ бо, по времени, совершилъ еси Искупленiе.

По семъ поется: Прiидите поклонимся, и припадемъ ко Христу, спаси ны Сыне Божiй, Имени Твоему поющiя Ти, аллилуiа, аллилуiя, аллилуiя.

Аще, же неделя, вместо: «Имени Твоему» – поется «Воскресый изъ мертвыхъ поющiя Ти, аллилуiа». И: Тропари:

Имени Божiю. Тропарь, гласъ 5:

Сiя глаголетъ Господь Богъ Вседержитель: / Азъ Господь Богъ, сiе Мое есть Имя[4] Вечное.[5]/ Живу Азъ, и присно живетъ Имя Мое.[6] / И ныне заповедь сiя к вамъ священницы: / аще не примете къ сердцу воздавати славу Имени Моему, / прокляну васъ и благословенiе ваше, / и уже проклинаю, / яко не хотите приложить к тому сердца.[7]

Сладчайшему Имени Iисусъ.

Тропарь, гласъ 8:

С высоты принесеся Имя Твое Iисусе, Спасе нашъ, / на наше избавленiе во искупленiе рода человеческаго. / Отъ Твоего Имени Iисусе, трясется адъ. / Мы же призываемъ Имя Твое, Iисусе, / и симъ самым пресладким Именемъ даруй намъ спасенiя.[8]

инъ Тропарь, гласъ 6:

Прiидите почерпите воду съ веселiемъ / отъ источника спасенiя. / Хвалите Господа, воспойте Имя Его, / возвестите во языцехъ славная Его: / поминайте, яко вознесеся Имя Его. / Хвалите Имя Господне, / яко высокая сотвори Господь: / возвестите сiя по всей земли.[9] / Iисусе, Спасительное Имя, помилуй мя.

Покрову Пресвятой Богородицы.

Тропарь, гласъ 4:

Днесь благовернiи людiе светло празднуемъ, / осеняеми Твоимъ Богомати пришествiемъ, / и къ Твоему взирающе пречистому Образу, / умильно глаголемъ: / покрый насъ честнымъ Твоимъ Покровомъ: / и избави насъ отъ всякаго зла, / молящи Сына Твоего Христа Бога нашего, / спасти души наша.

Священномученику Антонiю.

Тропарь, гласъ 4:

Ревностный обличителю имяборнаго отступленiя / отъ Божества Имени Божiя / и отъ истиннаго Православiя; / провозвестниче царю земному кары Царя Небеснаго / за грехъ Синода, похулившаго Имя Господне, / дивный пророче и усердный молитвенниче, / подобный Илiи ревнителю Славы Имени Божiя, / из земнаго воина преобразивыйся в воина Царя Небеснаго, / преславный отче Антонiе, / молися усердно о насъ ко Господу, / любовiю почитающихъ святую память твою.

инъ Тропарь, гласъ 8:

Не по мнозе времене исполнишася пророчества / отца нашего блаженнаго Антонiя, Царю Николаю Второму реченная: / свергнутъ бо царскiй престолъ Россiи, / и прiиде гневъ Божiй на страну нашу, отступницу, / похуленiя ради Имени Божiя. / О страшнаго великаго Божiя наказанiя! / Помилуй насъ, Господи, помилуй насъ, / по велицей милости Твоей, и по множеству щедротъ Твоихъ, / молитвами Пречистыя Твоея Матере, / и Святаго отца нашего Антонiя и всехъ Святыхъ.

Тропари: Дневной и Празднуемаго Святаго по месяцеслову.

И поется Трисвятое.

Чтецъ: Прокименъ, глас 4:

Возвеселится праведникъ о Господе, и уповаетъ на Него.

Ликъ: Возвеселится праведник о Господе, и уповает на Него.

Чтецъ: Услыши Боже гласъ мой, внегда молитимися к Тебе.

Ликъ: Возвеселится праведник о Господе, и уповает на Него

Чтецъ: Возвеселится праведникъ о Господе,

Ликъ: и уповаетъ на Него.

Апостолъ: Филипписiемъ, зач. 240:

• Къ Филипписiемъ святаго апостола Павла чтенiе.

Братiе, Сiе бо да мудрствуется въ васъ, еже и во Христе Iисусе: Иже, во образе Божiи сый, не восхищенiемъ непщева быти равенъ Богу: Но Себе умалилъ, зракъ раба прiимъ, въ подобiи человечестемъ бывъ, и образомъ обретеся, якоже человекъ, Смирилъ Себе, послушливъ бывъ даже до смерти, смерти же крестныя. Темже и Богъ Его превознесе, и дарова Ему Имя, еже паче всякаго имене; Да о Имени Iисусове всяко колено поклонится небесныхъ и земныхъ и преисподнихъ, И всякъ языкъ исповесть, яко Господь Iисусъ Христосъ въ славу Бога Отца, Аминь. Аллилуiа, аллилуiа, аллилуiа.

Ликъ: Аллилуiа… (3-жды)

Чтецъ: Праведникъ яко финиксъ процвететъ, и яко кедръ иже въ Ливане умножится.

Ликъ: Аллилуiа… (3-жды)

Чтецъ: Насаждени въ дому Господни, во дворехъ дому Бога нашего процветутъ.

Ликъ: Аллилуiа… (3-жды)

Евангелiе Матфея, зач 36.

Чтецъ: Отъ Матфеа Святаго Евангелiя чтенiе.

Ликъ: Слава Тебе, Господи, слава Тебе.

Чтецъ: Рече Господь, Се Азъ посылаю васъ яко овцы посреде волковъ: будите убо мудри, яко змiя, и цели, яко голубiе. Внемлите же отъ человекъ: предадятъ бо вы на сонмы, и на соборищахъ ихъ бiютъ васъ: И предъ владыки же и цари ведени будете Мене ради, во свидетельство имъ и языкомъ. Егда же предаютъ вы, не пецытеся, како или что возглаголете: Не вы бо будете глаголющiи, но Духъ Отца вашего глаголяй въ васъ. Предастъ же братъ брата на смерть и отецъ чадо: и возстанутъ

чада на родители, и убiютъ ихъ. И будете ненавидими всеми Имене Моего ради: претерпевый же до конца, той спасенъ будетъ.

Ликъ: Слава Тебе, Господи, слава Тебе.

Заупокойная Ектенiя: (если нет священника: заупокойное пенiе: Господи помилуй 9 раз, и: чтенiе именъ усопшихъ).

Поминаются усопшiе въ правой вере. А усопшiе въ общенiи съ имеборной антицерковью сродники поминаются съ прибавкой: «Аще возможно», помяни Господи… А закоренелые имяборцы, безбожники и другiе еретики вообще не поминаются, ихъ предавать на волю Божiю.

После поминовенiя:

Прочее Изобразительныхъ (Обедницы) по Часослову:

Чтецъ: Помяни насъ Господи, егда прiидеши во царствiи Твоемъ. Помяни насъ Владыко, егда прiидеши во царствiи Твоемъ. Помяни насъ Святый, егда прiидеши во царствiи Твоемъ.

Слава, и ныне:

Ликъ небесный поетъ Тя и глаголетъ:

Ликъ поетъ: Свят, Святъ, Святъ Господь Саваофъ, исполнь небо и земля славы Твоея.

Стихъ: Приступите къ Нему и просветитеся, и лица ваша не постыдятся. Лик небесный поетъ Тя и глаголетъ:

Ликъ: Святъ, Святъ, Святъ Господь Саваофъ, исполнь небо и земля славы Твоея.

Слава: Ликъ святыхъ Ангелъ и Архангелъ со всеми небесными силами, поетъ Тя, и глаголетъ:

Ликъ: Святъ, Святъ, Святъ Господь Саваофъ, исполнь небо и земля славы Твоея.

Чтецъ: И ныне…

Ликъ: Верую во единаго Бога Отца…

Чтецъ: Ослаби остави…

Ликъ: Отче нашъ…

Имени Божiю. Кондакъ, гласъ 4:

Яко да Имя Мое не осквернится предъ языки… / вы же доме Израилевъ, / сице глаголетъ Адонаи Господь: / кiйждо кумиры своя отымите, / и аще послушаете Мене, / и Имени Моего Святаго не осквернавити…/ И познаете, яко Азъ Господь, / да Имя Мое не осквернится злыми путями вашими.[10]

Сладчайшему Имени Iисусъ.

Кондакъ, гласъ 6:

Царское Имя Iисусъ / на небеси и на земли царствующее: / на небеси все естество Ангельское / безпрестанно славитъ Пресвятое Имя Твое, Iисусе,[11] / на земли людiе возносятъ туюжде песнь, / составляется общее торжество / небесныхъ и земныхъ существъ вкупе славящихъ Тя. / Iисусе, Спасительное Имя, помилуй мя.[12]

инъ Кондакъ, гласъ 6:

Имя Твое Iисусе Спасе нашъ, / аки солнце мiръ облеста, / аки мvро благовонное вселенную облагоуха: / удиви Ангеловъ, обрадова человековъ, / устраши бесовъ, / прогоняется мракъ имяборчества, / благочестiя же возсiяваетъ светъ, / и просвещаетъ всякаго человека, въ мiръ грядущаго.[13]

Покрову Пресвятой Богородицы.

Кондакъ, гласъ 3:

Дева днесь предстоитъ въ Церкви, / и съ лики святыхъ за ны невидимо молится Богу: / Ангели со архiереи покланяются, / Апостоли же со Пророки ликовствуютъ: / насъ бо ради молитъ Богородица превечнаго Бога.

Священномученику Антонiю

Кондакъ, гласъ 8:

Не по мнозе времене исполнишася пророчества отца нашего Антонiя, Царю Николаю реченная: сдвигнулся бо царскiй престолъ Россiи, прiиде гневъ Божiй на страну нашу, отступницу, похуленiя ради Имени Бога. О страшнаго наказанiя! Помилуй насъ, Боже, по велицей милости Твоей, молитвами Пречистыя Твоея Матере, преподобноисповедника отца нашего Антонiя и всехъ Святыхъ.

Кондаки: Дневной и Празднуемаго Святаго по месяцеслову.

Чтецъ: Слава…

Ликъ: Со святыми упокой…

Чтецъ: И ныне…

Ликъ: Предстательство христiанъ непостыдное:

Чтецъ: Господи помилуй 12 разъ, и:

Всесвятая Троице…

Ликъ: Буди Имя Господне благословенно… трижды

Слава, и ныне…

Ликъ: Благословлю Господа… (Псал. 33)

Достойно есть яко воистину…

Слава и ныне: Господи благослови:

Молитвами святыхъ отецъ нашихъ, Господи Iисусе Христе Боже нашъ, помилуй насъ. Аминь.

Песнопенiя въ конце службы:

Утвержденiе на Тя надеющихся, / утверди Господи Церковь, / юже стяжалъ еси / честною Твоею кровiю (Трижды).

Утверди Боже, / святую православную веру, православных христiанъ, / во векъ века.

Всю братiю нашу и вся православныя христiаны, / Господи помилуй, Господи помилуй, Господи помилуй, / Господи сохрани ихъ на многая лета.

Упованiе мое Отецъ, / прибежище мое Сынъ, / покровъ мой Духъ Святый: / Троице Святая, слава Тебе.

Богородице Дево, / упованiе христiаномъ, / покрый, соблюди, и спаси на Тя уповающихъ.

Не имамы иныя помощи, / не имамы иныя надежды, / разве Тебе Владычице, / Ты намъ помози, / на Тебе надеемся, / и Тобою хвалимся, / Твои бо есмы раби, да не постыдимся.

Все упованiе мое на Тя возлагаю, / Мати Божiя, / сохрани мя подъ кровомъ Твоимъ.

Владыко Христе Царю Многомилостиве, / прiими молитвы рабъ Твоихъ, / и избави насъ, отъ всякiя нужды и печали.

Владычице, прiими молитвы рабъ Твоихъ, / и избави насъ, / отъ всякiя скорби и болезни.

Господи помилуй, / Господи помилуй, / Господи помилуй. / Аминь.

Господи мой Господи, / Пастырь мой родной, / спаси меня отъ ада, / и будь всегда со мной.