Слава Ему во веки!

Аминь.

Акафистъ

Преподобноисповеднику

Афонскому Мартинiану

(День его кончины 8.07 – 21.07.1929 г.)

Выпуск 2

+

Кондакъ 1.

Избранный отъ Бога быти защитникомъ Славы и Божества Имени Божiя, / исповедниче преподобне отче Мартинiане, / вселивыйся во Афонъ и подвизавыйся более тридесяти летъ, / Егда же возгореся тамо ересь имяборная, / не терпя злохуленiя Имени Божiя, / ревностно сталъ еси противу ереси безбожныя, / заградилъ еси хульныя уста имяборца Алексiя Киреевскаго, / темъ же восхваляемъ Тя любовiю и зовемъ ти: / Радуйся, Мартинiане, защитниче славы Имени Божiя, и молитвенниче о душахъ нашихъ.

I к о с ъ 1

Яко ангелъ земный и небесный человече явился еси промысломъ Божiимъ предъ грядущею кончиной вековъ, во младости вступилъ еси во святый Афонъ, земный жребiй Матери Божiей Игуменiи Святыя Горы, и показавый строгую подвижническую жизнь: постомъ, молитвою и послушанiемъ стяжалъ еси умносердечную молитву и плачь непрестанный. Сего ради, воспоминая строгiй путь святой жизни твоей, приносимъ ти наши похвалы:

Радуйся, истинный подвижниче Христовъ;

Радуйся, любимиче и друже Iисусовъ;

Радуйся, мiръ возненавидевый и Христа Iисуса возлюбивый;

Радуйся, оставивый дольнее, стяжавый горее Царствiе;

Радуйся, образъ кротости и смиренiя инокамъ бывый;

Радуйся, любезный Господу делатель молитвы Iисусовой;

Радуйся, суету мiра презревый, ради Царствiя Небеснаго;

Радуйся, печаль по Господу деннонощно имевый;

Радуйся, сосудъ благодати Божiей избранный;

Радуйся, Мартинiане, новый исповедниче и молитвенниче о душахъ нашихъ.

Кондакъ 2

Видя суету мiра сего, ничтоже полезное душе приносящу, ты отче Мартинiане, удалился еси отъ мiра и пустынному безмолвному житiю предался еси во святемъ Афоне, и непрестанною молитвой Iисусовой вселилъ еси Христа Iисуса въ сердце свое; дивнаго въ тебе подвижника Своего явилъ Iисусъ Христосъ; сего ради, радуяся о тебе славимъ Господа, вопiя Ему: Аллилуiа.

I к о с ъ 2

Разумъ свой, отче Мартинiане, посвятилъ еси «единому напотребу», ничесоже въ мiре семъ возлюбивый паче Сладчайшаго Iисуса, Емуже непрестанно вопiялъ еси: Господи Iисусе Христе, Сыне Божiй, помилуй мя! Симъ пресладкимъ Именемъ вселилъ еси Iисуса въ сердце свое, съ нимъ же не разлучался еси до страдальческой кончины твоея. Сего ради, любовiю поминая твой крестный путь жизненный, прославляемъ Тя званiи сими:

Радуйся отче блаженнейшiй, Iисуса приявый въ сердце свое;

Радуйся, Богородицу, Матерь Света, возлюбивый;

Радуйся, Архангелов и Ангелов призывавый;

Радуйся, яко всемъ Святымъ Божiимъ моливыйся;

Радуйся, блюститель истиннаго благочестiя;

Радуйся, яко память Божiю непрестанно хранивый;

Радуйся, молитвою, яко воздухомъ благодатнымъ дышавый;

Радуйся, яко память смертную присно имевый;

Радуйся, яко живя на земли, мыслiю пребывалъ еси на небеси;

Радуйся, Мартинiане, новый исповедниче и молитвенниче о душахъ нашихъ.

Кондакъ 3

Силою Всеспасительнаго Имени Iисусова, побеждалъ отче Мартинiане, козни вражiи, и одного мгновенiя не бывъ безъ Имени Сего, и явилъ еси намъ образъ, да не оставляемъ память Божiю, да призываемъ непрестанно Iисуса въ молитве Iисусовой. Благодарни суще Богу, даровавшему намъ таковаго истинного наставника, вопiемъ Ему: Аллилуiа.

I к о с ъ 3

Имущи Iисуса Христа въ сердцы своемъ, отче Мартинiане, ты явился на Афоне защитникомъ чести, славы и Божества Спасительнаго Имени Его, егда воздвигъ тамо врагъ спасенiя рода человеческаго пагубную ересь хулящую пресладкое Имя Iисусово иноками имяборцами. Поминая исповедническую ревность твою, почитаемъ тя званiи сими:

Радуйся, хранитель чистоты веры Православныя;

Радуйся, ревностный защитниче славы Имени Божiя;

Радуйся, исповедниче Божества Имени Iисусова;

Радуйся, избранный Богомъ сосудъ Божiя благодати;

Радуйся, истинный рабе Божiй;

Радуйся неленостный слуга Господень;

Радуйся, правоверiя хранителю;

Радуйся, исповедниче веры во Имя Господне;

Радуйся, хранитель чистоты Православiя несообщенiемъ съ имяборцами;

Радуйся, Мартинiане, новый исповедниче и молитвенниче о душахъ нашихъ.

Кондакъ 4

Буря страшныя ереси имяборческiя постиже святую Гору Афонъ, егда во обители Святаго Пантелеимона возгорелась имяборная ересь, потрясая всю Гору Святую земный Жребiй Царицы спасенiя нашего. Тогда вси истиннiи иноцы, въ нихъ же первымъ ты, отче Мартинiане, выступили въ защиту Славы и Божества Имени Божiя. Сего ради благодарни суще Богу, вопiемъ Ему: Аллилуiа.

I к о с ъ 4

Слышавъ отче Мартинiане, яко лже-схимникъ Алексiй Киреевскiй началъ хулити Имя Божiе, отрицая Его Божество и называя Его вымысломъ человеческимъ, ты возгорелся еси ревностiю Илiиною, и заградилъ уста богохульныя Киреевскаго. И первый на Афоне явился защитникомъ Славы Имени Божiя. Сего ради прiими отъ насъ, отче, похвалы сiя:

Радуйся, ревностный защитниче вечного бытiя и Славы Имени Божiя;

Радуйся, Илiи подражавый въ ревности о славе Божiей;

Радуйся, глубокiй кладязь веры и благочестiя;

Радуйся, свирепаго еретика Киреевскаго уста заградивый;

Радуйся, чуждую Православия ересь имяборную изобличивый;

Радуйся, воинъ Христовъ непобедимый въ рати съ имяборцами;

Радуйся, Исповедниче Православныя веры во Имя Божiе;

Радуйся, яко прославивый Имя Божiе на земли;

Радуйся, яко ныне славиши Имя Господне на небеси;

Радуйся, Мартинiане, новый исповедниче и молитвенниче о душахъ нашихъ. Кондакъ 5

Богоданную звезду истинныя Церкви Христовой, явилъ въ тебе Господь, во дни брани съ имяборцами на Афоне, яко въ собори Отцевъ Фиваидскихъ подъ твоимъ руководствомъ осуждена бысть злохульная ересь богоборная, восхулившая Имя Господне. Сего ради, ты, отче Мартинiане, яко дивный победоносецъ воспевалъ еси песнь Богу: Аллилуiа.

I к о с ъ 5

Видеша иноцы исповедницы Афонстiи, яко ересь имяборная заразила многихъ иноковъ, создали ополченiе имяславческое «Союзъ Архангела Михаила исповедниковъ Имени Божiя», противу полчища имяборческаго, во еже не общатися съ нимъ; ты же отче Мартинiане въ лике имяславческомъ несообщаясь съ имяборцами славилъ еси Имя Божiе; сего ради, мы же воспеваемъ тебе:

Радуйся, звезда пресветлая Православiя;

Радуйся, светильникъ неугасаемый Имяславiя, еже суть истинное Православие;

Радуйся, терпеливодушный исповедниче Имени Божiя;

Радуйся, неисчерпаемый кладязь духовной мудрости;

Радуйся, яко жизнь свою посвятилъ еси во славу Имени Божiя;

Радуйся, яко подвигомъ твоимъ укрепляеши верныхъ ко спасенiю;

Радуйся, не угасающая свеща, молитвою къ Богу горящая;

Радуйся, яко не давалъ еси сна очима твоима молитву деюще;

Радуйся, новый подвижниче веры и благочестiя;

Радуйся, Мартинiане, новый исповедниче и молитвенниче о душахъ нашихъ.

Кондакъ 6

Проповедникомъ богоноснымъ славы Имени Божiя на Афоне и въ Россiи явился еси, отче Мартинiане, яко во всю землю изыде вещанiе словесъ твоихъ, егда обличилъ еси хулу на Имя Господне Алексiя Киреевскаго, тогда силы демонскiя вострепеташа, убояся неисповедимыя силы Всемогущаго Имени Iисусова. Ты же въ лике имяславческомъ славилъ еси Имя Господне, Имъ же держится весь мiръ,[1] вопiя Богу: Аллилуiа.

I к о с ъ 6

Возсiялъ еси, отче Мартинiане, яко светъ въ лике имяславческомъ на Афоне, въ веселiи и радованiи прославляя хвалимое на небеси Ангелами и славимое на земли человеками Всесвятое Имя Пресвятыя Троицы. Сего ради, и мы прославляемъ Имя Господне; а тебе, отче, приносимъ похвалы сiя:

Радуйся, неумолкаемая свирель, прославляющая Имя Пресвятыя Троицы;

Радуйся, яко гусли Давидовы, уста твоя возсылали хвалу Богу;

Радуйся, смиренный подвижникъ и усердный молитвенникъ;

Радуйся, за Имя Господне на Афоне пострадавый;

Радуся, за Имя Божiе изъ Афона изгнанникъ;

Радуйся, слезныя токи из очей твоих присно источавый;

Радуйся, о мiре молитвы Богу возсылавый;

Радуйся, крине, источавшiй медоточныя словеса;

Радуйся, верою во Имя Господа Iисуса демоны посрамивый;

Радуйся, Мартинiане, новый исповедниче и молитвенниче о душахъ нашихъ.

Кондакъ 7

Хотящу Ти, отче Мартинiане, въ лике имяславческомъ славити Имя Господне, нестерпеша демони и вооружиша на исповедниковъ все силы свои, да не славится на Афоне Имя Божiе; вы же, слушаясь Бога, а не человековъ, славили Пресвятое Имя Господа Бога, поя Ему: Аллилуiа.

I к о с ъ 7

Новаго Тя, отче Мартинiане, показа Господь всему мiру исповедника Славы и Божества Имени Своего, за Него же и пострадати сподобилъ тя, и всему мiру показаль непоколебимаго столпа исповедничества и светильника Церкви Своея; сему радуяся и благодаря Бога, приносимъ Ти похвалы наши:

Радуйся, непоколебимый столпъ исповедничества;

Радуйся, неугасаемый светильникъ веры Православной;

Радуйся учителю правоверiя;

Радуйся, изобличителю кривоверiя;

Радуйся, непобедимый воинъ Христовъ;

Радуйся, нищету возлюбивый, богатства ради Небеснаго;

Радуйся, великимъ церковнымъ исповедникамъ подражавый;

Радуйся, преподобнымъ Отцам ревновывый;

Радуйся, Царствiя Небеснаго наследниче;

Радуйся, Мартинiане, новый исповедниче и молитвенниче о душахъ нашихъ.

Кондакъ 8

Странно видети, яко ты, отче Мартинiане, слабый теломъ, явился еси на Афоне и въ мiре семъ непобедимый крепкiй воинъ Христовъ, победивый демоновъ всесильнымъ оружiемъ - Именемъ Iисусовымъ, Его же Силы, трепещутъ бесы. Ты же непрестанно хвалебную песнь приносилъ Богови, поя Ему: Аллилуiа.

I к о с ъ 8

Весь былъ еси, отче Мартинiане, въ Бозе, и Богъ былъ въ тебе, яко же рече святый Iоаннъ Кронштадтскiй и многiя Святые, и сего ради укрепляемый Божiей благодатiю, поразилъ полки демоновъ исповедничествомъ славы и Божества Имени Божiя. Сего ради приносимъ ти похвалы сiя:

Радуйся, непобедимый демонами, воинъ Христовъ:

Радуйся, стена и ограда истинной Церкви отъ имяборчества;

Радуйся, ревнитель чистоты Православiя;

Радуйся, искоренитель ереси, хулящей Имя Господне;

Радуйся, верою твоею фимiамъ Имени Божiю принесшiй;

Радуйся, силою Имени Iисусова главу дракона поразивый;.

Радуйся, скорбь демонамъ принесшiй;

Радуйся, прославленiемъ Имени Божiя всехъ небожителей возвеселивый;

Радуйся, со Ангелы и Святыми на небеси славящiй Имя Господне;

Радуйся, Мартинiане, новый исповедниче и молитвенниче о душахъ нашихъ.

Кондакъ 9

Всякое естество ангельское удивися, отче Мартинiане, ангельской ревности твоей о славе Имени Божiя, и святой защите Божества Его. Мы же земнороднiи восхищаемся тобою и воспеваемъ благодарственную песнь Богу: Аллилуiа.

I к о с ъ 9

Ветiи имяборческiя, яко же рыбы безгласныя, видевше твою, отче Мартинiане, божественную ревность о славе Имени Божiя, не могущи опровергнути веру твою во Имя Божiе, воздаша Ти клеветою, безсилiе свое темъ показующе. Мы же купно съ тобою славимъ Имя Господне, и приносимъ тебе сiи хваленiя наша:

Радуйся, неподвижимый столпъ Церкви Божiей;

Радуйся, несокрушимая ограда веры Православныя;

Радуйся, яко непрестанно славиши Имя Творца всяческихъ;

Радуйся, посрамивый хулу имяборческую;

Радуйся, обрадовавшiй исповедниковъ Имени Божiя;

Радуйся, неверныхъ на путь истинный наставлявшiй;

Радуйся, и насъ грешныхъ въ правеверiи утвердившiй;

Радуйся, яко день и ночь Имя Божiе прославлявшiй;

Радуйся, небоязненный обличителю нечестiя безбожниковъ;

Радуйся, Мартинiане, новый исповедниче и молитвенниче о душахъ нашихъ.

Кондакъ 10

Спасти хотя остатокъ веры Православной пред кончиною временъ, Господь воздвигъ на Афоне ревнителей славы Имени Своего ликъ имяславческiй, въ немъ же и ты, отче Мартинiане, да покажетъ он мiру истинное Православiе, забытое архiереями имяборцами. Сего ради, спасшiися проповедiю Имяславiя избегнувшiи всемiрнаго оступленiя отъ веры во Имя Божiе, приносимъ Богу Спасителю нашему песнь: Аллилуiа.

I к о с ъ 10

Стена и покровъ истинному Православiю явился на Афоне ликъ имяславческiй «Союзъ Архангела Михаила исповедниковъ Имени Божiя» показавшiй мiру истинное Православiе въ Имяславiи, въ немъ же ты, отче Мартинiане, безпрестанно славилъ еси Имя Господа Iисуса. Ныне же славиши Имя Святыя Троицы на небеси. И сего ради, прiими наши радостные восклицанiя:

Радуйся, земный и небесный имяславецъ;

Радуйся, веселящiй насъ грешныхъ въ сiи дни скорбные;

Радуйся, укрепляющiй насъ въ надежде помилованiя Богом, славы ради Имени Его;

Радуйся, громозвучный славитель Имени Пресвятыя Троицы;

Радуйся, прославляющiй сладчайшее Имя Iисусъ Христово;

Радуйся, научившiй насъ твердо стояти за веру во Имя Божiе;

Радуйся, за Имя Господне гоненiе претерпевый;

Радуйся, великiя скорби изгнанничества Христа ради понесшiй;

Радуйся, отче, яко награда твоя велiя на небеси;

Радуйся, Мартинiане, новый исповедниче и молитвенниче о душахъ нашихъ.

Кондакъ 11

Пенiе сiе недовольно для прославленiя великихъ трудовъ и подвиговъ твоихъ, отче Мартинiане, долголетней въ скорбехъ жизни твоей, ихъ же Самъ Господь весть; намъ же удобнее прославити видимые страданiя твоя, не сокрытыя отъ очiю нашею; воздаемъ тебе посильныя наши хваленiя, и славимъ Господа Бога, поя Ему: Аллилуiа.

I к о с ъ 11

Яко свещу именуемъ Тя, отче Мартинiане, во тьме имяборческаго отступленiя явльшуюся, для спасенiя остатка верныхъ христiанъ, возжигающую Светъ истинной веры въ прославленiи Имени Божiя, и яко зарею умъ просвещающую последовати Имяславiю. Сего ради восхваляемъ тя:

Радуйся, светильниче, в неведенiи сущим светящiй истиною;

Радуйся, заря светозарная, озаряющая путь къ Имяславiю;

Радуйся, возжигающiй любовь къ славословiю Имени Божiя;

Радуйся, зарница, озаряющая путь заблудшимъ;

Радуйся, истинный нашъ духовный старецъ, наставникъ;

Радуйся, путеводная звезда, ищущимъ спасенiя.

Радуйся, оградо, отъ еретическихъ заблужденiй;

Радуйся, всемъ заблудшимъ, дарующiй вразумленiе;

Радуйся всемъ вернымъ радость и веселiе;

Радуйся, Мартинiане, новый исповедниче и молитвенниче о душахъ нашихъ.

Кондакъ 12

Благодать Божiя на последокъ временъ, восхоте даровати мiру светильника веры и благочестiя для спасенiя верныхъ отъ заблужденiй, приснопамятнаго отца нашего Мартинiана, послужившаго кормчимъ въ мори житейскаго плаванiя возлюбленнымъ чадамъ Божiимъ, во еже избавитися имъ козней вражiихъ во зле лежащаго мiра, и спасеннымъ воспевати Богу песнь: Аллилуiа.

I к о с ъ 12

Поюще благодарственную песнь Богу, даровавшаго намъ отца Мартинiана, вернаго наставника ко спасенiю при всемiрном отступленiи отъ Искупившаго мiръ Владыки въ спасительномъ Имени Его Iисусъ, Его же уничижила и восхулила iерархiя церкви Россiйской; и тебя отче, по силамъ нашимъ восхваляемъ:

Радуйся, Отцевъ славная красото;

Радуйся, яко живя на земли, о горнемъ помышлялъ еси;

Радуйся, скорби земныя, яко злато воспрiялъ еси;

Радуйся, антихристу не поклонивыйся въ мiре семъ;

Радуйся, козней вражiихъ силою Имени Iисуса избеглъ еси;

Радуйся, главу предъ Вааломъ не преклонилъ еси;

Радуйся, сладкопеснивый славитель Имени Божiя;

Радуйся, радостно и терпеливо страдавый за Имя Господне;

Радуйся, всем сердцемъ возлюбивый пресладкое Имя Iисуса;

Радуйся, яко злато в горниле, скорбями очистив душу свою;

Радуйся, достойный наследниче горнего Iерусалима;

Радуйся, Мартинiане, новый исповедниче и молитвенниче о душахъ нашихъ.

Кондакъ 13

О, преславный и дивный отче Мартинiане! Прiими отъ насъ недостойныхъ, яко дань, приносимую тебе хвалу и благодаренiе за яже содеялъ еси для спасенiя нашего, во славу Имени Божiя, яко многiя души извлеклъ еси из пагубнаго отступленiя. Не возгнушайся малымъ хваленiемъ нашимъ великих твоихъ подвиговъ Царствiя ради Небеснаго, его же да сподобимся и мы грешнiи, твоими святыми молитвами, и купно съ тобою, со Ангелы и всеми Святыми на небеси радостно воспевати Богу боголепную песнь: Аллилуiа.

(Сей Кондакъ глаголется 3-жды, затемъ Iкосъ 1, и Кондакъ 1).